نبذة عن تاريخ الفلوس الورقية

الثلاثاء 24 ديسمبر 2019

كنا قبل كدة اتكلمنا عن المقايضة وتاريخها، ولازم طبعاً نتكلم على الفلوس الورق، اللي واحدة واحدة سيطرت على السوق والتجارة.

هل الشكل الحالي للفلوس هو شكلها أول ما ابتدوا يستخدموها؟
لا طبعاً، أول شكل للفلوس كان في شكل ورق بردي أو معمول من جلد الحيوانات، وكان زي الشيكات، وكان بيوعد شخص معين بإن يدفعله مبلغ معين من الفضة أو الذهب، وكانت غالباً الحكومة هي اللي بتصرفهم. بيختلف المؤرخين عن بداية التعامل بالنوع ده من الفلوس، في شوية مقتنعين إن الصين هي موقع أول استخدام من النوع ده من الفلوس، وفي ناس تانية بتقول لا ده الرومان هما أول ناس اخترعوا فلوس ورق.

ليه الناس ابتدت تتجه لاستخدام الفلوس؟
في أسباب كتير بس منها:
 • نقل كمية كبيرة من الذهب والفضة كانوا حاجة مش عملية وبتعرض اللي بينقل العملات دي لخطر السرقة.
 • ازدياد معدل التضخم الخاص بالذهب والفضة في أوروبا بداية من القرن الـ15 وحتى القرن الـ17 بسبب تطور إمكانيات التعدين والرحلات الاستكشافية للأمريكتين اللي أدت لدخول كمية كبيرة من  الذهب والفضة للقارة الأوروبية.
 • ظهور نظريات خاصة بتحديد قيمة المنتجات والعرض والطلب.
 • تأسيس البنوك المركزية في القرن الـ17.
 • تخزين التجار للعملات الذهبية والفضية في البنوك خوفاً من السرقة.
 • تطور الفلوس من ورقة بتحدد الشخص اللي بيدفعله المبلغ لورقة بتحدد قيمة المبلغ اللي ممكن يتصرف لأي حد معاه الورقة.

مين أول بنك ابتدى يصدر فلوس؟
أول بنك كان بنك سويدي في 1661، والسبب الرئيسي كان إن عملات الكرونة السويدية كانت تقيلة جداً لدرجة إن شيلها مابقاش شيء عملي. بس أول بنك يصدر فلوس دايمة هو بنك إنجلترا في 1695، وكان أول نسخة من الفلوس دي مكتوبة باليد.

وفي مصر، الجنيه الورق اتطبع لأول مرة في سنة 1899 عن طريق البنك الأهلي، وكانوا قبل كدة بيستخدموا عملات مش فلوس ورق.