يعني إيه كرديت كارد (بطاقة ائتمان)؟

الثلاثاء 24 ديسمبر 2019

كل ما الواحد يروح البنك، الناس هناك يقعدوا يسألوا إن كان عايز يعمل كرديت كارد، بس هو إيه الكرديت كارد ده؟

الكرديت كارد هو كارت تقدر تستخدمه في أي مكان، برة أو جوة مصر في المحلات أو أونلاين من غير ما رصيد حسابك في البنك ينقص، البنك بيدفعلك وأنت بعد كدة بتسدد للبنك حسب خطة السداد الخاصة بالكارت.
بمعنى أصح، أنت بتستلف فلوس من البنك، وبعد كدة بتسددها على مهلك، وفي المقابل البنك بياخد فايدة على الفلوس اللي أنت استلفتها بعد فترة السماح. نسبة الفايدة بتتحدد حسب نوع الكارت وحسب معدل الفايدة اللي حدده البنك المركزي، وطبعاً البنك هو اللي بيحدد النسبة مش أنت.

السداد بيبقى إزاي؟
بعد ما بتستخدم الكارت، بيبقى في فترة سماح، لو سددت في خلال الفترة دي، عادة 50-55 يوم، ما بيتحسبش عليك فايدة، بعد فترة السماح، البنك بيصدر كشف حساب بالمبلغ اللي تم صرفه، وأقل مبلغ لازم تدفعه، والمدة اللي قدامك عشان تدفع أقل مبلغ بدون ما يكون عليك غرامة أو رفع نسبة الفايدة عليك. أهم حاجة إنك تدفع المبلغ قبل ميعاد السداد.

إيه مميزات الكريدت كارد؟
 • ميزة الكريدت كارد الأساسية هي تأجيل الدفع، وده بيديك فرصة إنك تستخدم فلوسك الكاش أو اللي في حسابك في البنك بالطريقة اللي تناسبك بدل ما تصرفها كلها مرة واحدة.
 • استخدام الكريدت كارد بيمكنك من استخدام تطبيقات زي Uber أو Otlob بطريقة أسهل من غير ما تقلق إن كان معاك فكة أو كاش كفاية.
 • واحدة من أهم مميزات الكريدت كارد هي إنك مش محتاج تشيل كاش.
 • تقدر تستخدم الكريدت كارد في مشترياتك على الإنترنت ودي ميزة مهمة لإن أغلب كروت الخصم المباشر في مصر ما بتقدمش الخدمة دي.
 • تقدر تستخدم الكرديت كارد برة مصر وأنت مسافر، وطبعاً مع أخطار السفر زي السرقة، الكرديت كارد بيبقى عليه تأمين، فلو حصل سرقة للكارت تقدر تبلغ عنه، والمبالغ اللي تم صرفها    بسبب السرقة ما بتتحسبش عليك.