يعني إيه قرض شخصي؟

الثلاثاء 31 ديسمبر 2019

القرض الشخصي هو وسيلة لتمويل حاجة خاصة زي مثلاً سفرية أو مولود جديد أو جواز، وهكذا. طبعاً القرض معناه إنك هيبقى عليك قسط شهري بفايدة معينة حسب كل بنك ومبلغ القرض.

على أساس إيه البنك بيقبل أو يرفض القرض الشخصي؟
البنك بيحدد إمكانية تمويل القرض الشخصي على أساس تاريخك المالي ودخلك الحالي، فبيعتمد على المستندات اللي أنت بتقدمها بالإضافة إلى تاريخك الائتماني المتحدد عن طريق الـi-score عشان يوافق أو يرفض طلبك، ويحدد على أساسه نسبة الفايدة للقرض.

إيه الفرق ما بين القرض الشخصي والقرض العقاري أو قرض العربية؟
الفرق الأساسي ما بين القرض الشخصي والقرض العقاري أو قرض العربية هو إن مافيش ضمان للقرض، بمعنى إن في حالة التمويل العقاري أو السيارة، لو حصل إن العميل ماقدرش يسدد القرض، بيتم الحجز على العربية أو البيت اللي تم تمويله، وبيبقى ملكية البنك.

إيه نسبة الفايدة على القرض الشخصي؟
نسبة الفايدة على القرض الشخصي بتختلف من بنك لبنك، وبتعتمد على كذا حاجة منهم إن كان المرتب بيتحول للبنك أو لا. في بنوك كتير بتوفر قروض مخصوصة للعملاء اللي مرتبهم بيتحول على حسابتهم في البنك،عشان ده بيضمن للبنك إنه يقدر يخصم القسط الشهري من مرتب العميل، وعشان كدة بيبقى نسبة الفايدة أقل من لو مافيش تحويل للمرتب. وعادة نسبة الفايدة بتقع ما بين 15-20%، عشان كدة مهم أوي تسأل عن النسبة وتعرف إزاي هتتحسب قبل ما توافق على القرض.

إيه اللي بيحصل لو ما قدرتش تسدد القرض الشخصي؟
في حالة عدم القدرة على السداد، ده بيأثر على الـi-Score بتاعك، وده بيأثر على مستقبلك المالي في حالة حبيت تقدم على أي تمويل تاني أو حتى كريدت كارد، عشان كدة لازم تفكر كويس قبل ما تقرر تاخد قرض شخصي.