يعني إيه تأمين؟

السبت 01 فبراير 2020

التأمين على شيء بيحول عبء  التعويض عن خسارته من عبء شخصي لعبء تتحمله شركة التأمين بنسبة معينة على حسب نوع التأمين، شركة التأمين بتقدر تتحمل العبء ده عن طريق تحميله على مجموعة العملاء عندها. بمعنى أصح، التأمين زي ما تكون عامل جمعية مع مجموعة من الناس، بس أنت مش عارفهم، وبتتعامل مع شركة التأمين اللي بتنوب عنك وعنهم في معاملات الجمعية، وطبعاً الجمعية دي ما بتقبضهاش غير لو حصل مشكلة للشيء اللي أنت مأمن عليه.

شركة التأمين بتعتمد على حساب احتمالية حدوث خسارة أو كارثة للشيء المتأمن عليه، ولو لقت إن في احتمالية كبيرة، بيبقى التأمين على الشيء غالي، ولو الاحتمالية قليلة، بيبقى التأمين أرخص.


أنواع التأمين:

التأمين بينقسم لأقسام كتير بس ممكن نقسمهم لفئتين أساسية واللي بيندرج تحتها أنواع التأمين التانية، الفئتين هم:

·        التأمين على الحياة والصحة

نوع التأمين ده عادة بيبقى على الأشخاص، رغم إن في بعض البلاد، بيبقى في تأمين صحي على الحيوانات الأليفة وده لإن تكلفة الأدوية وزيارات الطبيب البيطري بتبقى أحياناً أعلى من تكاليف البني آدمين.

·        التأمين على الممتلكات/ التأمين ضد الكوارث

نوع التأمين ده بيبقى على الممتلكات ضد السرقة أو الحرايق أو الكوارث الطبيعية وهكذا ، وطبعاً بيتقسم لأنواع تانية كتير، وممكن يبقى تأمين شخصي أو تأمين شركات.


أساسيات التأمين

·        بوليصة التأمين:

لما بتروح تأمن على حاجة أو شخص، بتروح لشركة التأمين، وبتتفق على بوليصة تأمين، وهي بتبقى العقد ما بينك وبين شركة التأمين اللي بينسق التعامل ما بينك وبين الشركة.

·        قسط التأمين:

قسط التأمين هو المبلغ المالي اللي أنت بتدفعه بطريقة دورية عشان التغطية التأمينية تفضل مستمرة، ولو عجزت عن دفع القسط، بتسقط بوليصة التأمين، وممكن تدفع غرامة أو بيزيد القسط لو حبيت تعيد التأمين.