يعني إيه تضخم؟

السبت 01 فبراير 2020

طول النهار بنسمع عن التضخم وتأثيره على الغلاء وسعر المعيشة، بس هو إيه التضخم أصلاً وليه بيحصل؟


التضخم هو نسبة ارتفاع أسعار السلع والخدمات في خلال فترة زمنية محددة، وبيأثر على القوة الشرائية للعملة، وده معناه إن كل ما نسبة التضخم بترتفع، كل ما العملة بتفقد قيمتها، فلو بتقدر تشتري 5 منتجات بنفس القيمة، مع التضخم العدد ده بيقل.


أنواع التضخم:

1.    تضخم التكاليف: وده بيحصل بسبب ارتفاع تكاليف الإنتاج أو التصنيع للمنتجات والخدمات.

2.    التضخم الطلبي: وده بيحصل بسبب زيادة الطلب على بعض المنتجات بدون توفرها، فالمنتجات دي بتبقى سلع نادرة.

3.    التضخم المدمج: بعد فترة من ارتفاع الأسعار المستمر، الناس بتبتدي تطالب بارتفاع مرتباتهم، وده بيسبب ارتفاع في التكاليف، فالتضخم بيبقى جزء من المنظومة الاقتصادية، وبيبقى متوقع ارتفاعه.


هل في أي فوايد للتضخم؟

في ناس ممكن ترحب بالتضخم، وهم الناس اللي بيمتلكوا أصول ثابتة، وسبب ترحيبهم بالتضخم لإنه بيزود قيمة الأصول اللي هم بيمتلكوها، فلما يروحوا يبيعوا الأصول دي، هيقدروا يعملوا ربح كويس، وده غالباً أكبر نوع استثمار بيحصل في مصر.


الناس اللي ممكن تحس إن التضخم بيأثر عليهم بطريقة سلبية هم الناس اللي بيعتمدوا على الكاش اعتماد كلي، وبسبب إنخفاض قيمة العملة، هيلاقوا إن قدرتهم على شراء المنتجات والخدمات قلت.


التضخم شيء طبيعي لازم يحصل في أي اقتصاد مع مرور الوقت، وفي أسباب كتيرة بتشارك في ارتفاعه، وزيادة التضخم بنسبة صغيرة كل سنة بيساعد على النمو الاقتصادي لإنه بيشجع الناس على الصرف لإن بيبقوا عارفين إن الحاجة اللي هيقدروا يشتروها دلوقتي ممكن ما يقدروش يشتروها بعد كدة، وبرضو بيشجع الناس على الاستثمار في أصول غير نقدية عشان يحافظوا على قيمة مدخراتهم.