يعني إيه بورصة؟

السبت 01 فبراير 2020

البورصة هي سوق أسهم الشركات المطروحة للبيع، وهي بقت جزء كبير من السوق المصري، وبقت مؤشر للاستثمار في البلد، بس في أغلب الوقت الواحد ما بيبقاش فاهم هي بتعمل إيه، بس عشان نفهم هي إيه البورصة، لازم نفهم الأول يعني إيه سهم في شركة.

يعني إيه سهم؟

أسهم الشركات هي حصص في ملكية الشركة، ولما الشركة بتطرح ملكيتها لعامة الشعب عن طريق سوق الأسهم (البورصة)، ده بيبقى معناه إن أي حد ممكن يبقى واحد من ملاك الشركة عن طريق إنه يشتري عدد من الأسهم بتاعتها، ونسبة ملكيته في الشركة بتعتمد على عدد الأسهم اللي هو اشتراها، وعادة اللي بيشتري أسهم بيبقى مالوش سلطة على إدارة الشركة إلا لو هو بيمتلك على الأقل 51% من الشركة.

طيب، الناس دي بتشتري الأسهم إزاي؟

زمان كان الناس لازم يبقى عندها حد بيشتري لها في البورصة، ودول بيبقوا الوسطاء ما بين الشاري والشركة المطروحة للبيع، وعادة كنت بتلاقيهم في البورصة، دلوقت ممكن تقدر تشتري عن طريق وسيط إلكتروني، وده بيديك مساحة أكبر من الحرية وسرعة الأداء، وبيبقى أرخص.

إيه اللي بيحدد أسعار الأسهم؟

لما الشركة بتطرح الأسهم بتاعتها لأول مرة، هي اللي بتحدد سعر السهم وبتبقى معتمدة فيه على تقييم السوق لقيمة الشركة، ورأس المال وأصولها، وهكذا، وبعد الطرح الأولاني، بيبقى السهم قيمته بتتحدد عن طريق العرض والطلب، وفي حاجات خارجية ممكن تأثر على سعر السهم زي فضايح أو سمعة الشركة وأستقرار السوق المحلي، وسياسات حكومية، وهكذا، عشان كدة الاستثمار في البورصة بيعتبر مخاطرة عالية مقارنة بالاستثمار في العقارات أو الودايع، ولكن في نفس الوقت، نسبة الأرباح فيه بتبقى عالية، وزي الأجانب ما بيقولوا مخاطرة أعلى معناها عائد أكبر.