يعني إيه ضريبة عقارية؟

السبت 01 فبراير 2020

تم تعديل قانون الضريبة العقارية رغم إن الضريبة دي موجودة من سنة 1954، ولكن كان اسمها العوايد، وكانت بتتفرض على العقارات اللي بيتم تأجيرها، وكانت بتوصل ل10% للوحدات الغير سكنية، ومن 10%-40% للوحدات السكنية على حسب الشريحة اللي العقار بيقع فيه. فكانت العوايد بتدفع عن طريق الملاك اللي بيأجروا المباني بتاعتهم.

في 2014، تم إصدار تعديل للقانون، فأصبحت كل العقارات المبنية على أراضي مصرية وقيمتها أعلى من 2 مليون جنيه مصري خاضعة للضريبة مع بعض الاستثناءات، فبعد التعديل ده، أصبحت مباني كتير خاضعة للضريبة، وتم إلغاء العوايد تماماً، وحلت محلها الضريبة العقارية.


سعر الضريبة:

الضريبة سعرها موحد وهو 10% من القيمة الإيجارية السنوية للمبنى بعد ما بيتم خصم المصاريف وهي 30% للمباني السكنية، و32% للمباني الغير سكنية. وبيتم تحديد القيمة الإيجارية للمبنى عن طريق لجنة متخصصة من مصلحة الضرايب.


الاستثناءات:

·        المباني أو الشقق اللي بتقل قيمتها عن 2 مليون جنيه مصري.

·        المسكن الرئيسي للشخص أو العائلة مدام قلت قيمته الإيجارية عن 24,000 جنيه في السنة.

·        أي عقار غير سكني بتقل قيمتة الإيجارية عن 1200 جنيه في السنة.

·        المباني اللي لسة بتتأجر بإيجار قديم.

·        المباني اللي بتعتبر منفعة عامة.

·        المباني الحكومية واللي بتتبع للجيش.

·        مباني الأحزاب السياسية.

·        مباني مراكز الشباب والرياضة.

·        مباني المؤسسات الغير ربحية زي المستشفيات والمدارس.

·        المباني المملوكة من جهة حكومية أجنبية.

·        الأراضي الغير مستغلة.

·        المقابر.