يعني إيه قرض عربية؟

السبت 01 فبراير 2020

قرض عربية معناه إنك بتاخد تمويل من البنك لتسهيل سداد قيمة عربية جديدة أو مستعملة حسب خطط التمويل المتاحة من البنك، الضمان بيبقى العربية اللي هتشتريها. عادة خطة السداد بتبقى في صورة أقساط شهرية زائد نسبة الفايدة حسب الخطة المتفق عليها.

إيه هي مكونات قرض العربية؟

·        المقدم: وده المبلغ المالي اللي هتدفعه كجزء أولي من ثمن العربية، والباقي هو اللي هتقسطه. عادة بيبقى 20-30% من ثمن العربية بس بيختلف من بنك لبنك.

·        نسبة الفايدة: الفايدة هي المبلغ الإضافي اللي بتدفعه على ثمن العربية في مقابل الحصول على القرض. النسبة طبعاً بتختلف من بنك للتاني، بس عادة بتقع ما بين 18-22%.

·        مدة القرض: هي المدة الزمنية للقرض اللي بتحددها مع البنك، وعادة مدة القرض بتبقى 1-7 سنين.

·        القسط الشهري: هو ده أساس القرض، والمبلغ بيعتمد على مدة القرض، ثمن العربية، ونسبة الفايدة.

·        المصاريف الإدارية: هي المصاريف اللي بتدفعها في مقابل المعاملات البنكية الخاصة بالقرض، وعادة بتبقى من 1-2% من تمن القرض.


هل في نوع قرض تاني ممكن تقدم عليه؟

اه، ممكن تقدم على قرض شخصي وتقارن ما بينه وبين قرض العربية، الفرق الوحيد هو إن قرض العربية دايماً بيبقى بضمان العربية، ولكن القرض الشخصي أحياناً ما بيبقاش بضمان حاجة معينة، وبيعتمد على حالتك المالية لتحديد القرض ونسبة الفايدة، وهكذا.


في أي حالة بيتم دفع غرامة؟

الغرامة بتختلف من بنك للتاني، بس عادة بتبقى 2-5% من المبلغ اللي بيتم دفعه، وبتبقى في الحالات دي:

·        الدفع المبكر، سواء كان دفع القسط الشهري أو مبلغ القرض بحاله.

·        الدفع المتأخر للقسط الشهري.

·        إعادة جدولة القرض.


إيه المستندات اللي محتاجها عشان تقدم على قرض عربية؟

·        الرقم القومي.

·        إثبات محل العمل أو الإقامة.

·        إثبات مصدر الدخل.

·        عرض سعر العربية.