إزاي تحمي الكريدت كارد بتاعك؟

الأحد 02 فبراير 2020

استخدام الكريدت كارد دلوقت بقى أسهل من الأول، أغلب المحلات بقت تقبل الكروت، ومع انتشار التسوق عبر الإنترنت، الطلب على الكريدت كارد زاد. بس في نفس الوقت، الكريدت كارد معرض لبعض المخاطر اللي الواحد لازم ياخد باله منها عند استخدام الكارت.

عشان كدة هنقولك على شوية نصايح تتبعها لما تستخدم بطاقتك الائتمانية أو أي بطاقة بنكية:

·         احتفظ بالرقم السري لنفسك، بدون ما تشاركه مع أي حد، وما تحطش الرقم السري في نفس مكان البطاقة عشان لو اتسرقت، ما يبقاش مع السارق كل المعلومات اللي محتاجها.

·         قبل ما تدفع أي حاجة، اتأكد إن الرقم اللي مكتوب على شاشة الماكينة هو نفس الرقم اللي مكتوب في الفاتورة.

·         اشترك في خدمة الإخطاران البنكية: الخدمة دي بتبعتلك رسالة على التليفون كل ما بيتم استخدام الكارت، والرسالة بيبقى فيها المبلغ المسحوب والمكان أو الموقع اللي تم استخدام الكارت فيه.

·         ما تستخدمش بطاقتك في مواقع غير مضمونة أو غير مؤمنة إلكترونياً لإن ده بيعرضك لخطر سرقة البطاقة، عشان كدة يُفضل استخدام بطاقتك في مواقع معروفة فقط. في نفس الوقت بلاش توافق على حفظ بيانات البطاقة في أي موقع، لإن لو تم اختراق الموقع أمنياً ده هيعرضك لخطر سرقة البطاقة.

·         ما تصورش البطاقة وتحطها على أي من مواقع التواصل الاجتماعي أو تبعتها لحد.

·         بُص على كشف الحساب الشهري قبل ما تدفع البطاقة عشان تتأكد إن مافيش أي معاملات غير مصرحة، ولو حصل إن لقيت في معاملات غريبة لازم تبلغ البنك على طول.

·         ما تشاركش بيانات البطاقة مع أي حد على التليفون، خصوصاً مع شخص أو شركة مش معروفة. في بعض الأحيان بتحتاج تقول البيانات على التليفون زي لما بتحجز تذكرة طيران عن طريق خدمة العملاء، بس دي استثناءات مش العادي.

في الآخر، لو أنت في أي وقت حسيت إن الشخص أو الموقف اللي أنت فيه مش مريح، بلاش تستخدم البطاقة، واسأل عن طرق تانية للدفع.