نبذة تاريخية عن الجنيه المصري

الأحد 02 فبراير 2020

الجنيه المصري شاف كتير الفترة اللي فاتت من تعويم وتضخم ومشاكل اقتصادية، وهو لسة واقف، بس هو إيه قصة الجنيه؟ وإزاي تطور للشكل اللي إحنا متعودين عليه؟


تم إصدار أول عملة مصرية سنة 1834 وكانت في شكل عملات من الذهب والفضة والعملة الواحدة كان اسمها قرش، وبعد كدة في 1836 تم إصدار الجنيه المصري لأول مرة، وقيمته استندت على قيمة العملات اللي قبله واعتمد على نظام المعدنين (الذهب والفضة)، وأصبح القرش 1/100 من الجنيه. وفي 1885 تم التخلي عن نظام المعدنين، وأصبح الجنيه بيعتمد على الذهب في تحديد قيمته، وتم تقسيم القرش إلى 10 أجزاء كان الأول اسمها "عشر قرش"، وتم تسميتها "مليم" في 1916.

هو إسم جنيه جاي منين؟

الجنيه جاي من عملة ذهبية بريطانية كانت اسمها Guinea Coin أو العملة الغينية (من غينيا الأفريقية)، وكانت قيمة العملة نفس قيمة الـ100 قرش تقريباً في نهاية القرن الـ19.


امتى تم اصدار الجنيه الورقي؟

تم إصدار أول جنيه ورقي سنة 1899 عن طريق البنك الأهلي المصري. وبعد كدة تم إسناد الدور ده للبنك المركزي المصري، وتم إنشاء قسم لطباعة العملات النقدية في 1967، وكان بيطبع بعض العملات للبلاد المجاورة كمان.


الجنيه كان بيساوي قد إيه أول ما تم إصداره؟

بعد التخلي عن نظام المعدنين في 1885، كان الجنيه بيساوي 7.34 جرام من الذهب تقريباً، وده كان معناه إن 1 جنيه إسترليني = 0.975 جنيه مصري. الجنيه فضل مربوط بالجنيه الإسترليني حتى 1962، وبعد كدة تم ربطه بالدولار الأمريكي، وده أدى إلى فقدانه لقيمته الأولية، وأصبح 1 جنيه مصري = 2.3 دولار أمريكي. وفي 1989 تم تعويم الجنيه جزئياً وانخفضت قيمة الجنيه، 1 دولار أمريكي = 3.33 جنيه مصري.