إيه الفرق ما بين الفايدة الثابتة والفايدة المتناقصة؟

الأحد 09 فبراير 2020

الفايدة هي نسبة الزيادة اللي بتدفعها على المبلغ اللي أنت بتستلفه، بس في نوعين من الفايدة: الثابتة والمتناقصة، بس في نهاية الأمر، نسبة الزيادة على القرض بتبقى واحدة، لكن طريقة حساب الأقساط الشهرية هي اللي بتفرق.


الفايدة الثابتة

في الحالة دي، الأقساط الشهرية اللي أنت بتدفعها مش بتأثر على طريقة حساب الفايدة، لإن بيتم حساب الفايدة من الأول على المبلغ الأصلي للقرض، وبعد كدة بيتم تقسيمها على مدة القرض.


الفايدة المتناقصة

هنا بقى الفايدة بتتغير على حسب المبالغ اللي بتدفعها لتسديد القرض، وبيتم حساب الفايدة كل شهر على حسب المبلغ اللي باقي تسديده، وعشان كدة نسبة الفايدة بتبقى كبيرة في الأول، وبعد كدة بتقل تدريجياً.


مميزات الفايدة الثابتة:

·        بتبقى عارف أنت هتدفع كام كل شهر لإن الأقساط لا يمكن تتغير.

·        نسبة الفايدة على النوع ده من القروض ممكن تبقى أقل من نسبة الفايدة المتناقصة.

·        النوع ده من القروض بيبقى مفيد لو متوقع إن البنك المركزي هيزود نسبة الفايدة خلال فترة دفعك للقرض.

·        بيبقى أفيدلك لو القرض قيمته صغيرة وهتسدده في مدة قصيرة.

·        طريقة حساب إجمالي الفايدة المدفوعة: قيمة القرض * نسبة الفايدة * عدد السنين.


مميزات الفايدة المتناقصة:

·        بتدفع فايدة أقل كل ما بتسدد.

·        بيبقى مفيد لو أنت متوقع إن البنك المركزي يخفض نسبة الفايدة في المستقبل القريب.

·        طريقة حساب الفايدة في أول سنة: مبلغ القرض * نسبة الفايدة * 12 شهر.

·        طريقة حساب الفايدة بعد أول سنة: (مبلغ القرض – المبلغ اللي تم تسديده) * نسبة الفايدة * 12 شهر.