نصايح لملاك البيوت الجداد

الجمعة 07 فبراير 2020

لو ناوي تشتري شقة أو بيت جديد، ممكن تكون نقيت الوقت الأفضل لده، لإن دلوقت السوق بيعاني من قلة البيع والشراء، وفي شركات كتير عاملة تسهيلات للتقسيط ماحدش شاف زيها بقالنا سنين، بس قبل ما تتسرع وتشتري، في حاجات لازم تخلي بالك منها.


·         حدد هدفك من شراء بيت جديد

هل البيت ده هتسكن فيه ولا هتاخده كاستثمار؟ تحديد هدفك هيساعدك إنك تقرر مواصفات البيت اللي أنت عايزه، لإنك لو هتسكن فيه، يبقى أكيد هتبقى عايزه قريب من الشغل، ومدارس الأطفال مثلاً، ولكن لو هو للاستثمار، يبقى مش هتفرق مكانه، ولكن هتفرق قيمته المستقبلية، وبالتالي هتعرف الميزانية اللي أنت هتلعب فيها.


·         اتأكد إن كانت الأقساط مناسبة لدخلك

بعد تحديد الميزانية للبيت، دور على برنامج أقساط يناسب دخلك بحيث إن كل الأقساط اللي بتدفعها ما تبقاش بتاخد أكتر من 50% من مرتبك الشهري.


·         دور على شركات موثوق منها وقارن مابينهم

اسأل ودور في السوق على شركات موثوق منها، وليها تاريخ في السوق، ما يفضلش إنك تتعامل مع شركة جديدة ماحدش له تعاملات معاها لإنك كدة بتاخد مخاطرة كبيرة بتحويشة عمرك. وطبعاً ما تحددش شركة واحدة من الأول، شوف أحسن خمس شركات في رأيك، وقارن ما بينهم، وما بين القيمة المستقبلية للعقارات بتاعتهم.


·         دور على ملاك من الشركة اللي هتشتري منها

قبل ما تمضي العقد، اتعب نفسك شوية ودور على تقييم من الملاك اللي عايشين في الكمباوند اللي هتشتري فيه، واليومين دول الموضوع بقى سهل بسبب وسائل التواصل الاجتماعي، كفاية إنك تكتب إسم الكمباوند في فايسبوك عشان تشوف الناس بيقولوا إيه عليه، وفي أغلب الوقت لو الكمباوند في مشاكل كتير، هتلاقي حاجات أكتر من لو هو مافيهوش مشاكل. الخطوة دي ممكن تبقى مزعجة شوية بس هتوفر عليك تعب مستقبلي.


·         اقرا العقد كويس جداً

لازم طبعاً تقرا العقد كويس جداً، وتتأكد من كل بند فيه عشان تتفادى أي مفاجآت ممكن تتطلع لك. ويفضل إنك تاخد رأي محامي، أو على الأقل حد شغال في مجال العقارات عشان تتأكد إن العقد سليم ومافيهوش مشاكل.


·         اسأل عن مصاريف الصيانة

ممكن الواحد يقرر يشتري بيت أزيد شوية في الفلوس على أساس إنه هيبقى أحسن أو في منطقة أفضل، ولكن في بعض الأحيان الناس بتنسى تسأل عن مصاريف الصيانة اللي عادة بتبقى مبلغ مالي كبير بيتم دفعه كل سنة، وفي بعض الشركات بتشترط زيادة المبلغ ده، وبيبقى مكتوب كبند في العقد، فلازم تسأل إن كانت مصاريف الصيانة ثابتة ولا متغيرة.


·         شوف تمويل عقاري يناسب امكانياتك

ممكن تفتكر إن تقسيط المبلغ كله حاجة في صالحك، بس الحقيقة المبلغ اللي هتقسطه بيبقى عليه نسبة فايدة إلا لو كان تقسيط بدون فوايد، وعشان كدة يُفضل إنك تدفع المقدم وتقسط الباقي، عشان الفايدة هترفع تكلفة البيت النهائية، ولكن في نفس الوقت لازم تشوف تمويل عقاري بيناسبك من حيث القسط الشهري، المصاريف الإدارية، عدد سنوات التقسيط، وإن كانت الفايدة ثابتة ولا متناقصة.