المصاحبة مش لازم تخرب البنك

الخميس 13 فبراير 2020

في ضغط كبير على الناس المتصاحبة إنهم يجيبوا هدايا، وينزلوا يصرفوا فلوسهم في المطاعم والكافيهات، ولكن المشكلة إن حالياً كل حاجة بقت غالية جداً، ولكن إحنا هنقولك على شوية حاجات ممكن توفر عليكم شوية.


حددوا توقعاتكم المالية مع بعض

أحسن حاجة ممكن تعملوها لعلاقتكم إنكم تتفقوا مع بعض على مستوى الصرف، وبكدة كل واحد فيكم هيقدر يبقى صريح مع التاني لو لقى إن حالته المالية مش هتسمح بالصرف، ومش هيبقى في حرج.


اقسموا المصاريف

بما إن إحنا مجتمع شرقي، لسة بيفكر بطريقة الرجل هو اللي بيصرف، في أغلب الأحيان، الرجل هو اللي بيدفع كل حاجة، بس الأوقات اتغيرت، والستات بقت تشتغل، فا مفيش مشكلة إنكم تتقاسموا الفلوس، وطبعاً، ده بيعتمد على كل واحد وأرائه. الستات ممكن تشوف إن ده مش في صالحها، بس في الحقيقة ده بيديهم حرية أكبر في العلاقة لإنهم مش هيحسوا إنهم مديونين لحد، ولو حصل إن الموضوع ما كملش، مش هيبقى في فكرة إن الست استغلت الرجل مالياً وبعد كدة سابته، كل واحد بيبقى ملك نفسه.


مش لازم تحتفلوا بالأعياد

في أعياد كتير زي الأنيفارسيري، والفالنتيان، وحاجات تانية كتير ممكن تفوتوها عشان توفروا على نفسكم فلوس، خصوصاً إن أغلب الأعياد دي بتبقى مفتكسة، وعشان كدة أفضل حاجة إنكم تحددوا إيه هي الأعياد اللي هتحتفلوا بيها، وإحنا بننصح بالإحتفال بأعياد الميلاد بس.


بس أنتم لو مصممين على الأعياد التانية ومش عايزين تصرفوا كتير، ممكن تشوفوا مقالتنا عن أرخص خروجات في القاهرة.