البنك المركزي يثبت الفايدة في شهر فبراير 2020

الجمعة 21 فبراير 2020

قرر البنك المركزي يوم الخميس 20 فبراير تثبيت سعر الفايدة، وده معناه إن النسب الحالية هي 12.25% للودايع و13.25% للإقراض هتفضل زي ما هي، وإن غالباً فوايد القروض والعائد على الشهادات والودايع في البنوك هتفضل زي ما هي.

يعني إيه تثبيت الفايدة؟
تثبيت الفايدة معناه إن مافيش تغيير في أسعار الفوايد في البنوك سواء للقروض أو الودايع وحسابات التوفير والشهادات، وطبعاً تحديد أسعار الفايدة بالنسبة للمنتجات البنكية المختلفة برضو في الآخر بيرجع لكل بنك مادام في الحدود اللي حاطها البنك المركزي.
 
في نفس الوقت، تثبيت سعر الفايدة بيساعد على مواجهة ارتفاع نسبة التضخم اللي زاد لـ7.2% في يناير 2020.

لو أنت هتقدم على قرض أو هتحط فلوسك في شهادة هل ده وقت مناسب؟
لو أنت عايز تقدم على قرض، ممكن تستنى شوية، لإن أغلب التوقعات بتقول إن البنك المركزي هيخفض الفايدة السنة دي عشان يحفز السوق.

لو أنت عايز تحط فلوسك في وديعة أو شهادة، فده وقت مناسب عشان تلحق قبل ما البنك المركزي يخفض الفايدة والعائد يقل أكتر. 

التوقعات الخاصة بباقي السنة:
أغلب الخبراء متوقعين تخفيض نسبة الفايدة عامة في 2020. وعلى حسب جريدة هابي، فتوقعات شركة فاروس بتميل لتخفيض معدل الفايدة من 200-300 نقطة تقريباً في 2020، وأكدت توقعات شركة أتش سي نفس الشيء بالرغم من توقعها بارتفاع التضخم في الريع الأخير من 2020 ليوصل 9% تقريباً.