إزاي تتعامل مع الضغوط المالية؟

الثلاثاء 24 ديسمبر 2019

الفلوس ساعات بتبقى بند موتر للأعصاب، خصوصاً لما الواحد بيبقى عنده عيلة بيصرف عليها، أو لو عليه ديون، ولكن زيادة التوتر في بعض الأحيان بيبقى بسبب الخوف، والتوتر ده مش هيفيد حد في حاجة، وعشان كدة لازم الواحد يلاقي طريقة عشان يتعامل بيها مع الضغوط المالية من غير ما تأثر على صحتك النفسية.

1. حدد مصادر الضغوط المالية
أول حاجة لازم تعملها إنك تحدد إيه هي الحاجات اللي بتسببلك ضغط أو بتحسسك بالتوتر، هل هي مصاريف مدارس الأولاد؟ المصاريف الشهرية؟ ديون؟ أول ما تحدد مصدر الضغوط، وتعرف قيمة كل بند من البنود اللي بتسببلك ضغط مالي، هتقدر تنتقل للخطوة التانية.

2. حدد ميزانية شهرية
بعد ما اتعرفت على الحاجات اللي عاملة لك ضغط وعبء مالي، لازم تحدد ميزانية للصرف والتوفير، عشان تعرف إن كان في مصروفات زيادة ممكن تستغنى عنها، أو لو في مصدر توفير ممكن يساعدك في تسديد المصاريف. أول ما تحدد ميزانية لنفسك، لازم تلتزم بيها. وعلى أساس ميزانيتك، ممكن تقدم على قرض شخصي يناسبك، وعن طريقه تسدد شوية من المصاريف اللي عملالك ضغط.

3. وفر على قد ما تقدر
التوفير مهم خصوصاً لما الواحد بيبقى مضغوط مالياً، ما تستقلش بأي مبلغ ممكن توفره حتى لو 10 جنيه، أي حاجة هتوفرها هتساعدك في المستقبل. خلي بالك من الصرف اليومي في حاجات مالهاش لازمة زي القهوة والشاي وأكل السوبرماركت.
واللي هتوفره، ممكن تحطه في حساب توفير، أو لو مبلغ كويس، ممكن تحطه كوديعة أو شهادة استثمار في البنك عشان تاخد عليه معدل فايدة أحسن.

4. أهم حاجة إنك تهدى
أهم حاجة إنك تفهم إن التوتر مش هيحل أي حاجة، بالعكس التوتر الزايد ممكن يجبلك مشاكل صحية، وده طبعاً مش في صالحك ولا مالياً ولا نفسياً. الهدوء والتفكير الحريص هو أحسن حاجة ممكن تعملها عشان تتغلب على حالة التوتر اللي بتسببها الضغوط المالية. فكل ما تحس بإنك متوتر، خد نفس عميق وافتكر إن دايماً بيبقى في حل لأى مشكلة.