يعني إيه مؤشر مديري المشتريات؟

الأربعاء 04 مارس 2020

مؤشر مديري المشتريات هو طريقة لقياس حركة السوق عن طريق استطلاع لمديري المشتريات لشركات القطاع الخاص برة قطاع البترول. مديري المشتريات هم اللي بيشتروا مستلزمات الشركات سواء للتصنيع أو تقديم الخدمات.


المؤشر بيشتغل إزاي؟

الاستطلاع بيسأل المديرين المختصين بإمدادات الشركة إن كانت الشركة سجلت تحسن أو لو فضلت زي ما هي أو سجلت نقص.


الفئات اللي الاستطلاع بيسأل عليها هي:

- الإنتاج
- الطلبات الجديدة من العملاء
- مخزونات الشركة من منتجاتها
- التوريدات
معدلات التوظيف


إزاي بيتم حساب المؤشر؟

الاستطلاع بيقسم ردود المديرين لـ3 فئات:

-         ف1 = نسبة الشركات اللي سجلوا تحسن.

-         ف2 = نسبة الشركات اللي سجلوا عدم تغيير في الحالة العامة.

-         ف3 = نسبة الشركات اللي سجلوا تراجع.

وبعد كدة بيدوا كل فئة وزن مختلف في المعادلة، فالفئة اللي سجلوا تحسن بيتم حساب نسبتهم زي ما هم، ولكن الفئة التانية بيتم تخفيض نسبتهم للنص، والفئة التالتة بيبقى وزنها صفر.


مؤشر مديري المشتريات = (ف1 * 1) + (ف2 * 0.5) + (ف3 * 0)


إزاي بيتم تفسير المؤشر؟

لو المؤشر سجل 50 نقطة، ده معناه إن السوق ثابت، ولو المؤشر نزل عن 50 يبقى في إنكماش في السوق، ولو زاد عن 50 نقطة يبقى في تحسن في السوق.


إزاي بيأثر على المستهلك؟

تأثير المؤشر على المستهلك مش تأثير مباشر لإنه بيقيس حركة الاستهلك الخاصة بالشركات، ولكن هو مفيد مثلاً لو أنت بتفكر تفتح مشروع لإنه بيديلك فكرة عن السوق المصري، ولو المؤشر في انخفاض حاد، يبقى حركة السوق بتقل جامد، ويمكن أفضلك إنك تستنى لغاية ما المؤشر يزيد شوية.