توقعات صندوق النقد الدولي للاقتصاد العالمي في أبريل 2020

الأربعاء 15 أبريل 2020

دايمًا في أول السنة، صندوق النقد الدولي بيقدم توقعاته للسنة الاقتصادية بعد دراسة الأحوال الاقنصادية حول العالم، وعادة بيتم إصدار التوقعات في يناير من كل سنة، ولكن بسبب فيروس الكورونا اللي غير حاجات كتير في الاقتصاد العالمي، قرروا يصدروا تعديل لتوقعات شهر يناير.


أهم التوقعات شملت:

لو الفيروس ما كملش بعد يونيو:

-        إنكماش السوق العالمي بقيمة 6% تقريباً، بعد ما كانوا متوقعين في يناير إن الاقتصاد العالمي هيشهد نمو بقيمة 3% تقريباً، وده على حسب الخبراء، ده هيكون أوحش إنكماش هيشهده السوق من ساعة الكساد الكبير في 1929.

-        لو فيروس كورونا الجديد ابتدى يختفي في النص التاني من السنة والحكومات أخدت قرارات صحيحة لمواجهته، فصندوق النقد الدولي متوقع إن السوق يزدهر في 2021 ويعوض الخسارة اللي حصلت في 2020، رغم إن برضو هيكون خسران لإنه ما حققش النمو اللي كان متوقع قبل ما الفيروس ينتشر.

-        الخسارة المتوقعة من ناحية الناتج المحلي الإجمالي العالمي هي تقريباً 9 تريليون دولار.

-        أكتر دول معرضة للخسارة هي الدول اللي الاقتصاد بتاعها معتمد على السياحة والترفيه.

-        وبالرغم من إن الدول النامية هتعاني أكتر بسبب الضغط على الموارد وضعف البنية التحتية خصوصاً الخاصة بالصحة، ولكن لأول مرة بتجتمع الدول المتقدمة والنامية في الخسارة.


لو الفيروس كمل بعد يونيو:

-        لو الفيروس ما ضعفش في النص التاني من السنة، فهم متوقعين إنكماش أكتر للسوق الدولي بقيمة 3% إضافية، يعني كدة إجمالي الخسارة هتبقى 9% تقريباً.


هل صندوق النقد الدولي أخد أي قرارات لمساعدة العالم في الظروف الحالية؟

-        صندوق النقد الدولي خصص 1 تريليون دولار للاقتراض لمساعدة الدول النامية على مواجهة الأزمة.