5 طرق لترتيب أمورك المالية في الربيع

الأحد 03 مايو 2020

الربيع معناه بداية جديدة لكل حاجة تقريباً، وعادة تقفيل السنة المالية بيبقى في يونيو، وعشان كدة الربيع يعتبر وقت كويس لترتيب أمورك المالية وتنظيفها أستعدادًا لسنة مالية جديدة، وعشان كدة هنشارك بـ5 طرق بسيطة تقدر فيهم ترتب أمورك وتستعد لسنة مالية أفضل.


1.      رتب أوراقك المالية

أول حاجة تقدر تعملها إنك تشوف أوراقك المالية اللي مركونة على جنب وبقالك شهور أو سنين ما شفتش فيها إيه، لو لقيت حاجات زي بيانات قديمة لحسابات أنت مش بتستخدمها، ممكن تستغنى عنها، شوف لو محتاج تجدد حاجة أو تطلع ورق أنت محتاجه، ولو هتتخلص من حاجة، اتأكد إنك تقطعها كويس قبل ما ترميها في الزبالة.

2.      اقفل الحسابات اللي أنت مش محتاجها

كلنا بيجي علينا وقت بيكون عندنا حسابات في البنوك مش بنستخدمها، وساعات بنفضل نتحاسب عليها وندفع لها رسوم على الفاضي من غير أي استفادة منها، وعشان كدة شوف حساباتك القديمة اللي أنت مش محتاجها واقفلها عشان تتفادى أي رسوم سواء رسوم إدارية أو غرامات رصيد غير كافي.

3.      بص على ميزانيتك السنوية

بما إن إحنا تقريباً في نص السنة، ده وقت كويس إنك تبص فيه على ميزانيتك اللي أنت حطيتها في أول السنة، وتشوف إن كنت ماشي على خطتك كويس، وده بيديك فرصة إنك تعيد تقييم طريقة صرفك أو تقرر تعدل في الميزانية مثلاً بطريقة مفيدة أكتر، لإن ممكن تكون بادي السنة بخطة معينة ولكن تحصل ظروف خارجة عن سيطرتك تخليك تقرر تعدل في الميزانية.

4.      اعمل تقييم للديون

لو عليك ديون، شوف أنت وصلت لفين من ناحية السداد وده بيتضمن الكريدت كارد والقروض، وممكن تلاقي إنك محتاج تعمل إعادة جدولة للقروض أو إنك تعمل إعادة تمويل لقروضك عشان تدفع مرة واحدة بس.

5.      إلغي أي اشتراكات مش بتستخدمها

شوف أي اشتركات عندك مش مستخدمة سواء اشتراكات شخصية أو عائلية، والغي الإشتراكات دي، ودي خطوة مهمة خصوصاً في وضع زي الحظر اللي خلى حاجات كتير مش شغالة زي الجيم وغيره.