أفلام عن المال والاستثمار اترشحت للأوسكار

تاريخ النشر: في طرائف وعجائب

أفلام عن المال والاستثمار اترشحت للأوسكار

اتفرجت على كام فيلم منهم؟

حفلة الأوسكار الـ 93 لسنة 2021 كمان كام ساعة، وبسبب فيروس كورونا الحفلة هتكون افتراضية زي السنة اللي فاتت، وقبل ما نتشد للترشيحات والجوايز الجديدة، خلينا نفتكر 4 أفلام في تاريخ الأوسكار كان موضوعهم الأساسي الفلوس!

 

1- فيلم  The Wolf of Wall Street 

 

الفيلم ده من أقوى الأفلام اللي بتتكلم على الاستثمار في البورصة، وهو انتاج 2014، ومستوحى من مذكرات رجل الأعمال السابق جوردن بلفورت اللي مثل دوره ليوناردو دي كابريو، وهو سمسار بورصة في شركة كبيرة في الوول ستريت في نيويورك في التسعينات، قدر ينجح ويكبر شغله ويفتح شركته الخاصة بس للأسف كان بيكسب فلوس كتير بطرق غير قانونية وفي الاخر اتحكم عليه بالسجن 3 سنين. من أغرب المعلومات عن الفيلم ده أنه سجل رقم قياسي في موسوعة جينيس للأرقام القياسية لأكبر عدد شتايم في فيلم سينمائي.

 

الفيلم اترشح لـ 5 جوايز اسكار لكن للأسف ما فزش بأي واحدة، الجوايز هي:

 

  • أفضل فيلم
  • أفضل مخرج
  • أفضل سيناريو مقتبس
  • أفضل ممثل
  • أفضل ممثل مساعد

 

2- فيلم UP

 

واحد من أشهر أفلام الكارتون اللي أعتبر أيقونة سينمائية للرومانسية، الفيلم انتاج 2009 لشركة بيكسار، بيحكي عن كارل، أو أستاذ فريد زين في النسخة العربي، اللي عاش عمره كله يحوش مع مراته عشان رحلة الأحلام وفي الاخر ماتت قبل ما تسافر لأنهم كانوا بيصرفوا الفلوس في حاجات أهم. فبيقرر كارل يأخد الفلوس اللي حوشها ويقوم بالرحلة أخيراً بس جوا بيته عشان يحس ان مراته معاه، بعد ما بيحول البيت لمنطاد بـ بلالين الهيليوم.

 

الفيلم اترشح لـ 5 جوايز من الأوسكار، فاز بـ 2 منهم، هما:

 

  • أفضل فيلم رسوم متحركة
  • أفضل موسيقى تصويرية

 

اترشح بس لـ:

 

  • أفضل صورة
  • أفضل سيناريو أصلي
  • أفضل تعديل للموسيقي

 

تفتكر كام فيلم هيتكلموا عن الفلوس في أفلام السنة دي؟

 

3- فيلم Michael Clayton 

 

الفيلم من إنتاج سنة 2008، مستوحى من قصة حقيقية للمحامي الأميركي المشهور مايكل كلايتون اللي مسك أكتر من قضية احتيال لموكليه، في واحدة منهم بيضر بشركته الخاصة اللي فاتحها مع أخوه مدمن المخدرات، وفجأة مشروعه بيبوظ بسبب القضية وأخوه، ومش بيقدر يغطي تكاليفه عشان يستمر.

 

الفيلم اترشح لـ 5 جوايز اوسكار فاز بواحدة بس هي أفضل ممثلة مساعدة، الجوايز هي:

 

  • أفضل فيلم
  • أفضل مخرج
  • أفضل ممثل
  • أفضل ممثل مساعد
  • أفضل ممثلة مساعدة

 

4- فيلم Slumdog Millionaire

 

فيلم بريطاني من إنتاج 2008، مقتبس من رواية "Q & A"  للكاتب الهندي فيكاس سوارب، بيحكي قصة جمال مالك، الشاب الفقير الجاهل اللي قدر يكسب " مليون روبية في برنامج من سيربح المليون في نسخته الهندية، واللي من شك الكل فيه بتقبض عليه الشرطة  وبيتحقق معاه على كل إجابة صح قالها فبيضطر يحكي قصة حياته عشان يبرر إجاباته.

 

الفيلم فاز بـ 8 جوايز للأوسكار، هي:

 

  • أفضل فيلم
  • أفضل إخراج
  • أفضل سيناريو
  • أفضل تصوير سينمائي
  • أفضل تصوير
  • أفضل إنجاز في التأليف الموسيقي (تأليف أساسي)
  • أفضل إنجاز في التأليف الموسيقي لأغنية
  • أفضل هندسة صوتية

 

واترشح بس لـ:

 

  • أفضل إنجاز في التوليف الصوتي
  • أفضل إنجاز في التأليف الموسيقي لأغنية

 

تفتكر كام فيلم هيتكلموا عن الفلوس في أفلام السنة دي، وياتري هيأخدوا الأوسكار؟


اختيار المحررين