ازاى تحتفل بـ شم النسيم في رمضان؟

تاريخ النشر: في طرائف وعجائب

 ازاى تحتفل بـ شم النسيم في رمضان؟

اعرف أكتر من طريقة هتساعدك تحتفل بشم النسيم في رمضان

 

موسم الربيع ابتدأ، وشم النسيم هيوافق الاتنين 3 مايو 2021، وبما انه جاي في رمضان فالخروج الصبح هيبقى صعب للأسف، لكن ده ميمنعش اننا نحتفل بيه.

عشان كده هنقول لكم علي شوية أفكار للأحتفال بعيد الربيع في رمضان، مع الحفاظ على الإجراءات الاحترازية اللي الدولة بتنادي بيها لمواجهة الموجة التالتة من فيروس كورونا Covid-19.

 

فطار الفلوكة:

 

مين ميحبش يفطر على النيل، وبعيد عن المطاعم والمراكب الغالية ممكن تأخدلك فلوكة مع أهلك وتجيبوا فطاركم وتقضوا ساعتين في قلب النيل. بالنسبة لأسعار تأجير الفلوكة فبتبدأ في حدود 150 جنيه للساعة، وبتختلف على حسب قدرتك علي الفصال، متنساش بس تعمل حساب المراكبي معاك في الأكل، وتأخد كحول وانت نازل.

 

Picnic الحديقة:

 

فكرة الـ Picnic منتشرة في مصر من فترة، واكيد هتبقي رائعة في الربيع، فممكن تأخد أهلك وفطاركم وتطلعوا على أي جنينة فاتحة في رمضان، بس متنساش طبعا تجيب حاجة تقعد عليها وكيس تلم فيه الزبالة قبل ما تمشي، ولازم تحطوا الكمامات طول ما في ناس حواليكم.

هتلاقي هنا معلومات أكتر عن الـ Picnic وأهر الجناين المفتوحة في القاهرة، افكار موفرة للـ Picnic في إفطار رمضان 2021

 

 

الحق احتفل بشم النسيم في رمضان على الفطار أو السحور ومتضيعش اليوم منك

 

 

في البلكونة:

 

ومالها البلكونة طراوة وعلى الشارع، دخلها نور وتربيزة واحتفل مع أهلك بالربيع من غير أي إجراءات احترازية ولا مشاوير في الطرق الزحمة.

 

أفطروا سمك:

 

أكيد صعب حد يفطر فسيخ ورنجة في رمضان، بس ممكن أكلة سمك مقلي أو مشوي عادي، مع خضروات شم النسيم، خس وجرجير وليمون…..إلخ، وأهو منها احتفال ومنها تقوية المناعة ضد الأمراض.

 

احتفل في السحور:

 

بما أن فكرة الاحتفال الصبح باظت السنة دي ليه منخليهاش أحتفال بليل في السحور، تلوين البيض المسلوق بقي والفول والطعمية مع الاستمتاع بلسعة السقعة اللي بتبقي موجودة في السحور، وبرضه هيبقي أحلي في البلكونة.


اختيار المحررين