ايه اللي ممكن يأثر على الاقتصاد العالمي في المستقبل؟

تاريخ النشر: في عالم المال

ايه اللي ممكن يأثر على الاقتصاد العالمي في المستقبل؟

تطور الاقتصاد العالمي واعتماده على التكنولوجيا هيغير كتير في اسلوب حياتنا.

مع ظهور العملات المشفرة، والاهتمام المتزايد بالتكنولوجيا الاقتصادية، آن الأوان إننا نفكر في مستقبل العالم الاقتصادي، خصوصاً مع فقدان الثقة في النظام الرأسمالي غير المنظم اللي اتسبب فى اختلاف جامد ما بين الطبقات الاجتماعية وتلوث البيئة بسبب الإنتاج الضخم للسلع من غيرترشيد لملوثات البيئة والاعتماد على الوقود الغير متجدد. بس هي إيه التصورات المتاحة للمستقبل الاقتصادي العالمي؟

 

الاعتماد على الذكاء الاصطناعي

 

مع تزايد الاعتماد على الذكاء الاصطناعي، في ناس متوقعة إن في بعض الوظائف التقليدية هيتم الاستغناء عنها بسبب إنها هيبقى أسهل تنفيذها عن طريق الكمبيوتر أو الروبوت، ولكن في نفس الوقت، الاعتماد المتزايد على الذكاء الاصطناعي هيخلق وظائف جديدة وده بالفعل ابتدى يحصل خصوصاً مع إنتشار المساعدين الإفتراضيين زي Siri وAlexa، ولكن الشغلانات دي متركزة في مجال البرمجة، وفي قائمة موقع indeed.com السنوية لأفضل الوظائف في أمريكا لعام 2019، كان منصب مهندس التعلم الآلي على قمة القائمة.

 

مرحلة ما بعد الرأسمالية

 

الفيلسوف الألماني كارل ماركس توقع نهاية الرأسمالية واستبدالها بنظام اقتصادي اجتماعي بسبب استبدال طريقة الإنتاج الضخم بطرق تانية تتماشى مع متطلبات المجتمع. جزء كبير من المفكرين الاقتصادين بيتوقعوا تغيير طريقة الانتاج والتجارة بحيث إن يكون العمال هم في ذات الوقت ملاك المشاريع، وبيتم التصنيع أو الانتاج بطريقة غير ملوثة ومستدامة، ولكن في جزء تاني من المفكرين بينحاز إلى إن الرأسمالية هتفضل مكملة بسبب إنها كانت موجودة بشكل أو آخر من آلاف السنين. 

 

في توقعات إنه هيتم استبدال الحكومات بشركات الإتصالات والتكنولوجيا وده لإنهم عندهم معلومات عن المواطنين أكتر من الحكومات.

 

تطور النظام المالي

 

في تصور إن من الممكن نتخلى عن البنوك في مقابل خلق نظام مالي جديد وده بسبب فقدان الثقة في البنوك بعد الأزمة المالية الأخيرة في 2008، وبسبب سهولة الاحتيال في النظام المالي الحالي، ومع انتشار استخدام العملات المشفرة، التصور ده مابقاش مجرد خيال، خصوصاً إن التزوير في العملة المشفرة مش سهل، وفي مؤسسات وبلاد كتير ابتدت تنضم لفكرة إنشاء عملة مشفرة، وبسبب إن العملات المشفرة ما بتطبعش، فهي ملاهاش أي علاقة بالبنوك، ولو اتجه المجتمع لفكرة الشغل بالعملات المشفرة، ممكن التخلي عن البنوك تماماً.

 

استبدال الحكومات

 

بسبب سيطرة التكنولوجيا على أغلب مجالات الشغل والاعتماد الكلي على شركات الاتصالات في الحياة اليومية، في توقعات إنه هيتم استبدال الحكومات بشركات الإتصالات والتكنولوجيا وده لإنهم عندهم معلومات عن المواطنين أكتر من الحكومات، وبيقدروا يعرفوا كل شيء تقريباً عنهم، وفي المستقبل امتلاك المعلومات هي القوة الحقيقية.


اختيار المحررين