يعني إيه تهرب جمركي؟

يعني إيه تهرب جمركي؟

اعرف اكتر عن التهرب الجمركى.

شارك

الجمارك بتشكل جزء مهم وكبير من ميزانية الدولة لإن أغلب المنتجات الغير أساسية اللي بيتم استيرادها في مصر بيبقى عليها جمارك، وفي أوقات كتيرة الجمارك ممكن توصل لـ40% من سعر المنتج الأصلي. وفي موازنة 2019-2020، الحصيلة الجمركية كانت تقريباً 51.7 مليار جنيه مصري، وده بيشكل 4.6% من إجمالي الإيرادات اللي داخلة للموازنة العامة، وعشان كدة التهرب الجمركي واحد من المشاكل اللي الحكومة بتحاول تقضي عليها عشان بيخسرها فلوس. 

 

التهرب الجمركي معناه هو دخول أي منتج أو سلعة بشكل غير قانوني وبدون دفع الرسوم اللي المفروض الواحد يدفعها في مقابل دخول المنتج ده البلد، وممكن برضو يندرج تحت التهرب الجمركي دخول سلع أو منتجات غير مصرح بيها.

 

إيه الخطوات اللي بتتاخد لما أي شحنة منتجات بتدخل البلد؟

 

1. بيحصل فحص للشحنة، وبيتم أخذ عينات منها.

 

2. بيتم التأكد إن المنتجات اللي في الشحنة هي نفس المنتجات اللي تم وصفها في بيان الشحنة.

 

3. بيتم التأكد إن الشحنة خالية من أي منتجات غير مصرح بدخولها لمصر.

 

4. بيتم تخليص الشحنة والإفراج عن المنتجات للمستورد مباشرة.

 

لو لقوا إن الشحنة فيها منتجات زيادة عن الموجودة في بيان الشحنة، فالمستورد بيدفع غرامة زائد الجمارك اللي على المنتجات دي.

 

إيه اللي بيحصل لو تم رصد منتج غير مصرح بيه أو منتج مش موجود على بيان الشحنة؟

 

لو مصلحة الجمارك شكت في إن في حاجة مخالفة في الشحنة:

 

1.  مش بيتم الإفراج عن الشحنة وبيتم إخطار الهيئة العامة للرقابة على الصادرات والواردات عشان هم بقى اللي بيفحصوا الشحنة تاني.

 

2. لو الجمراك شكت في إن الموضوع له دعوة بالأمن، فممكن كمان تبلغ البوليس أو الجيش.

 

3. لو لقوا إن الشحنة فيها منتجات زيادة عن الموجودة في بيان الشحنة، فالمستورد بيدفع غرامة زائد الجمارك اللي على المنتجات دي.

 

4. لو لقوا منتجات غير مصرح بيها، فبيتم مصادرتها، وممكن الشركة أو الشخص المسؤول يتم مسائلته قانونياً.

 

إيه العقوبات الخاصة بالتهرب الجمركي؟

 

بالنسبة للغرامات، فهي بتبقى من 500 إلى 50,000 جنيه مصري، على حسب نوع التهرب الجمركي.

بالنسبة للحبس، فممكن الشخص المهرب يتسجن من سنتين إلى 5 سنين على حسب نوع التهرب الجمركي.

اختيار المحررين