إيه الفرق ما بين حساب التوفير والحساب الجاري؟

اعرف الفرق وايه الأفيد ليك

شارك

حساب التوفير والحساب الجاري هما من المنتجات البنكية الأساسية، ودول بيبقوا أساس التعامل على أي حاجة تانية مع البنك.

 

الحساب الجاري

بيبقى حساب غير مدر للفايدة، وغالباً بيبقى مفيد للشركات أكتر من الأفراد لأنه بيعتمد على دخول وخروج كميات نقدية كبيرة عن طريق الشيكات أو التحويلات البنكية. 

 

فوايد الحساب الجاري:

 

  • الفايدة الأساسية من فتح حساب جاري بالنسبة للشركات هو إمكانية سحب أي مبلغ بدون الحاجة لإخطار البنك مسبقاً، وده مفيد لأي شركة محتاجة تتم صفاقات بسرعة وبدون تعقيد.

 

  • ما بيبقاش في حد لعدد المعاملات سواء السحب أو الإيداع، بس طبعاً ممكن الموضوع ده يختلف من بنك للتاني.

 

  • إمكانية السحب على المكشوف، وده نوع من التسهيلات اللي بيقدمها البنك، وده بيعني إنك ممكن تأدي معاملة بدون ما يكون عندك رصيد كافي في البنك، ولكن طبعاً بيبقى لها حد أقصى، وبيتحسب عليها فايدة.

 

 في المقابل، عادة الحد الأدنى للحسابات الجارية بيبقى عالي.

 

حساب التوفير هو الحساب المناسب للطوارئ، وتقدر توصله في أي وقت.

 

حساب التوفير

بيبقى حساب مدر للفايدة، بس نسبة الفايدة بتبقى أقل من منتجات بنكية تانية.

 

فوايد حساب التوفير:

 

  • حساب التوفير مفيد جداً لو عندك شوية فلوس مش محتاجها على طول، بس ممكن تكون محتاجها في وقت قريب، يعني الحساب المناسب للطوارئ، أو الكاش اللي أنت بتسيبه لوقت الأزمات لإن هيوصلك فايدة على المبلغ اللي أنت حاطه في الحساب.

 

  • حساب التوفير تقدر توصله في أي وقت، غير الوديعة اللي بتبقى مربوطة لفترة زمنية محددة ولو فكيتها ممكن تدفع رسوم.

 

  • قدرة السحب في أي وقت أنت عايزه مدام معداش حد السحب اليومي. 

 

  • قدرة الإيداع أو إتمام تحويلات بنكية محلية أو دولية في أي وقت.

 

اختيار المحررين