إيه اللي بيأثر على أقساط التأمين؟

تاريخ النشر: في قاموس الفلوس

إيه اللي بيأثر على أقساط التأمين؟

على أي أساس بيتم تسعير بوليصة التأمين؟

أقساط التأمين هي أساس بوليصة التأمين، بس في حاجات كتير بتحدد إزاي بيتم تسعير بوليصة التأمين، واللي طبعاً بيأثر على سعر الأقساط اللي أنت بتدفعها. وعلى حسب نوع التأمين، طريقة دفع الأقساط بتختلف، فممكن تكون شهرية، أو كل 3 شهور، وهكذا، وفي بعض الأحيان ممكن بوليصة التأمين تتطلب دفع مقدم.

 

العوامل الأساسية اللي بتأثر على سعر أقساط التأمين:

 

نوع التأمين 

 

بيختلف قسط التأمين على حسب نوع الحاجة اللي متأمن عليها وقيمتها، فمثلاً في حالة التأمين على العربية، سعر التأمين بيبقى تقريباً 2-4% من تمن العربية لإن احتمال إن العربية تدخل في حادثة عالي، ولكن في حالة التأمين على بيت، فسعر التأمين بيبقى تقريباً 0.2-0.4% من قيمة البيت.

 

التفاصيل الشخصية

 

التفاصيل الشخصية زي سن ونوع الشخص اللي مقدم على التأمين بيفرق. مثلاً في حالة التأمين على عربية، عادة التأمين للستات بيبقى سعره أفضل من التأمين للرجالة، بسبب فكرة إن الرجالة سوقاتهم متهورة أكتر، وفي نفس الوقت التأمين على واحد كبير في السن أوي أو حد لسة بادي سواقة ممكن يبقى أعلى من حد في نص عمره.

 

المكان اللي أنت عايش فيه بيأثر على سعر أقساط التأمين لإن شركة التأمين بتدرس نسبة الحوادث والسرقات في الحي اللي أنت عايش فيه عشان تعرف نسبة المخاطرة أد إيه.

 

المدينة أو الحي اللي أنت عايش فيه

 

المكان اللي أنت عايش فيه بيأثر على سعر أقساط التأمين لإن شركة التأمين بتدرس نسبة الحوادث والسرقات في الحي اللي أنت عايش فيه عشان تعرف نسبة المخاطرة أد إيه، فلو الحي اللي أنت عايش فيه نسبة الحوادث فيه عالية، يبقى ممكن ده يسبب في ارتفاع أسعار الأقساط عليك.

 

تاريخك التأميني والائتماني

 

لو حصل إنك أمنت على حاجة قبل كدة، فالشركة هتروح تدرس البوليصة القديمة، وتشوف كمية الطلبات اللي أنت قدمتها على البوليصة، كل ما الطلبات اللي قدمتها تزيد، كل ما تمن البوليصة هيزيد.

 

تقييم المخاطر

 

الخطوة دي مهمة لأي شركة تأمين، فلو الشركة لقت إن نسبة المخاطر كبيرة لدرجة إن البوليصة مش هتبقى مربحة بالنسبة لهم، فهم ممكن يرفضوا يأمنوا على الحاجة، أو ممكن يزودوا سعر البوليصة جداً، على حسب تقيمهم للموقف.


اختيار المحررين