إيه هي طريقة الـ 50-30-20 اللي بيتقسم بيها المرتب؟ 

تاريخ النشر: في قاموس الفلوس

إيه هي طريقة الـ 50-30-20 اللي بيتقسم بيها المرتب؟ 

ازاي ممكن تقسم المرتب وتظبط ميزانيتك وتحوش منها كمان

في طرق كتير للتحويش بتختلف علي حسب أهدافنا، تسديد دين أو تحقيق حلم أو أي نوع من الالتزامات الضرورية، بس في طريقة تخليك تحوش بسهولة أي أن كان هدفك وبشكل مستمر هي طريقة الـ 50-30-20، وهي فكرة سهلة جداً هتساعدك تظبط ميزانيتك الشهرية والموضوع كله بيعتمد على تقسيم فلوسك بنسبة 50% 30% 20%، والطريقة هي:



 

50% للالتزامات

 

خصص 50% من مرتبك للضروريات وكل الالتزامات اللي عليك زي الإيجار وفواتير الكهرباء وقسط القرض أو الكريدت كارد، ولو في جزء لسه فاضل من الـ 50% دول ممكن تجيب بيهم الأكل واللبس، بس الأكل ده هيكون الضروري مش الأكل من بره لأن ده ليه حساب تاني.



 

ممكن كمان كل فترة تعمل شهادة استثمار بالمبلغ اللي حوشته

 

20% للتحويش

 

حاول على قد ما تقدر انك ماتصرفش من الـ 20% دول أي حاجة، طبعاً لو عرفت تحوّش أكتر يبقى احسن وخليهم للمستقبل والأهداف اللي نفسك تحققها. وعشان المبلغ يكبر بسرعة ممكن تستثمره بأي شكل زي انك مثلا تفتح حساب توفير و تحط فيه الـ 20% كل شهر وهتبقى حوشت وكمان عملت حساب التضخم.

وممكن كمان كل فترة تعمل شهادة استثمار بالمبلغ اللي حوشته، وتقدر تختار الشهادة المناسبة ليك من فايدتي.



 

30% للمصاريف الشخصية

 

الـ 30% دول هيكونوا للرفاهية وللمصاريف المتغيرة اللي مش ضرورية ومش بتحتاجها كل شهر، زي الشوبينج والأكل من بره والخروجات، أهم حاجة تاخد بالك وما تخليش الحاجات دي تعدي النسبة بتاعتها من مرتبك.



 

مميزات طريقة الـ50-30-20 :

 

  • مناسبة للدخل الثابت والمتغير.
  • سهلة التطبيق والتعديل.
  • هتتعود على تنظيم مصاريفك و هتقدر تفرق ايه الضروري وايه اللي مش مستاهل.
  • هتعرف بشكل واضح اكتر اذا انت محتاج تزود دخلك فعلاً.



 

ازاي ابتدي؟

 

اهم حاجة ان يكون عندك العزيمة انك عايز تتخلص من كل ديونك وتعرف تتفرغ لأهدافك، تاني حاجة اعمل عندك في الموبايل منبه يفكرك يوم القبض انك الشهر ده هتمشي على طريقة تحويش جديدة عشان متنساش وتأجل للشهر اللي بعده. وطبعاً مع الوقت لما تتعود على الطريقة دي هتقدر تظبطها حسب مصاريفك بشكل دقيق أكتر، زي مثلا 20% مواصلات و 15% للأكل، ….إلخ.


اختيار المحررين