يعني إيه جمارك؟

يعني إيه جمارك؟

احنا ليه بندفع جمارك؟

شارك

الجمارك (رسوم الاستيراد) هي الفلوس أو الضريبة اللي بتحصلها الحكومة على السلع اللي جاية من برة، وهي طريقة لتنظيم دخول السلع والمنتجات للبلد.

 

إيه الهدف من الجمارك؟

 

الجمارك ليها كذا هدف:

 

1. الجمارك، زي الضرايب، بتمثل دخل ثابت لميزانية الدولة.

 

2. بتنظم دخول المنتجات للبلد، وبكدة الحكومة تقدر تزود الجمارك على السلع اللي هي مش عيزاها تبقى موجودة بكترة في السوق، أو ممكن تزود الجمارك جداً بحيث تمنع دخول المنتجات دي لإنها هتبقى غالية بزيادة.

 

3. الجمارك ممكن تستخدم لتحمي الصناعات المحلية من المنتجات المستوردة المنافسة ليها، وبكدة الحكومة بتدي الصناعات المحلية مساحة عشان تتطور.

 

الجمارك، زي الضرايب، بتمثل دخل ثابت لميزانية الدولة.

 

إيه اللي بيحصل لما تجيب حاجة من برة؟

 

لما بتجيب أي حاجة من برة وتشحنها، مصلحة الجمارك بتقدر سعرها (حتى لو السعر مكتوب) وبتحسب عليها نسبة رسوم الجمارك، اللي بتختلف على حسب نوع المنتج زائد ضريبة القيمة المضافة، ولازم تدفعهم لإما مش هينفع تاخد الحاجة، وبيبقى فيه قواعد كتير بالنسبة شراء منتجات وشحنها من برة عشان كدة لازم تتأكد إن نوع المنتج ده مش ممنوع. ولو عايز معلومات أكتر، ممكن تشوف موقع مصلحة الجمارك اللي عليه كل حاجة بالتفصيل.

 

إيه هي نسبة الجمارك؟

 

بتختلف من منتج للتاني، فمثلاً اللبس، ممكن الجمارك عليه توصل 60%، والعربيات ممكن توصل 40%، ولو عايز تعرف الرسوم، شوف موقع مصلحة الجمارك.

 

هل في شركات ممكن تساعد في موضوع الجمارك؟

 

أيوة، لو حابب تشتري حاجات من برة ممكن تستخدم شركة شحن متخصصة زي شوب أند شيب أو Edfa3ly، وهم بيتولوا موضوع تخليص الجمارك، وكل اللي عليك إنك تدفع الرسوم.

 

اختيار المحررين