إزاي تحافظ علي البيئة من غير ما تصرف كتير؟

إزاي تحافظ علي البيئة من غير ما تصرف كتير؟

غير عاداتك الاستهلاكية للحاجات المضرة للبيئة وكمان هتوفر فلوسك.

شارك

اليومين دول، الواحد بيسمع كتير عن فكرة الإحتباس الحراري والتلوث البيئي، وإزاي إن إحنا قدامنا وقت قليل عشان نصلح الموضوع وإلا هنعاني بسبب الكوارث البيئية اللي هتحصل في المستقبل اللي ممكن تقضي على البشرية، بس في نفس ساعات الموضوع بيبقى مكلف جداً، وعشان كدة هنقولك على طرق بسيطة تقدر تحافظ بيها على البيئة من غير ما تصرف كتير، ده ممكن توفر كمان.

 

1. امشي أو استخدم العجلة كل ما تقدر

 

أحياناً كتير الناس بتكسل تمشي مشوار هياخد مثلاً ريع ساعة، بس الحقيقة إنك لو استغنيت عن العربية، هتوفر بنزين وكمان المشي أو ركوب العجلة رياضة كويسة بالنسبة لك.

 

2. شيل كيس قماش معاك

 

بدل ما تستخدم أكياس بلاستيك كل ما تشتري حاجة، شيل معاك كيس قماش، وارفض الأكياس البلاستيك في المحلات.

 

مجرد تقليل استهلاكك للكهربا أو الغاز بيساعد البيئة، وبرضو هتوفر.

 

3. ما تستخدمش شاليموه

 

هو الواحد كان بيعمل إيه قبل اختراع الشاليموه؟ كان بيشرب من الكوباية على طول. الشاليموه هو حاجة الواحد مش محتاجها خالص، وفي شوية كافيهات برة ابتدوا يستغنوا عن توفير الشاليموه تماماً أو استبدال الشاليموه البلاستيك بشاليموه ورق أو استانليس.

 

4. قلل استخدام الكهربا أو الغاز في بيتك

 

مجرد تقليل استهلاكك للكهربا أو الغاز بيساعد البيئة، وبرضو هتوفر. اقفل كل الأنوار اللي مش محتاجها، شيل الفيش من الكبس، اقرا كتاب بدل ما تتفرج على التلفزيون، اقفل السخان. 

 

5. كل على قدك

 

أحياناً الواحد بيطلب أكل كتير وبعد كدة يلاقي إنه مش قادر يكمله ويرميه في الزبالة، ممكن بدل ما ترميه تحتفظ بيه، وتاكله اليوم اللي بعده، أو تطلب أكل على قدك بحيث ما يبقاش فيه فائض.

 

مش لازم تتخلى عن كل حاجة في سبيل البيئة، ممكن بس ترشد استهلاكك للحاجة، وبكدة بتكون ساعدت البيئة باللي بتقدر عليه، أي حاجة بتفرق، حتى لو حاجة صغيرة.

اختيار المحررين