إزاي تعمل ميزانية للبيت؟

اعرف ازاي تظبط مصاريفك وتحقق أهدافك المالية.

شارك

لو أنت عندك عيلة بتصرف عليها، يبقى أكيد المصاريف بتشغل حيز كبير من تفكيرك، وعشان كدة ممكن تحديد ميزانية لبيتك وأفراد عيلتك يساعدك إنك تتحكم في المصاريف أكتر وتحدد إيه أكتر حاجة ممكن تكون بتأثر بطريقة سلبية على ميزانيتك.

 

1. حدد دخلك ومصاريفك

 

أول حاجة لازم تعملها هو إنك تحدد دخلك، وده بيتضمن مرتبك، وأي ربح بيجي من ممتلكاتك وهكذا، أنت هنا بتحسب الفلوس اللي داخلة لك، مش الفلوس اللي أنت محوشها، دي بتفضل على جنب، ما بتجيش عندها.

بعد ما تحدد دخلك، لازم تحدد مصاريفك، وده بيتضمن المصاريف اليومية زي الأكل والمواصلات، والمصاريف غير اليومية زي مصاريف المدرسة والنادي مثلاً.

لو أنت لسة مبتدي ومش عارف تحدد مصاريفك اليومية، يبقى ممكن تاخد شهر تجمع فيه المصاريف عن طريق إنك تكتب كل حاجة بتدفع فيها فلوس بالتفصيل، وتطلب من أفراد عيلتك كمان يعملوا كدة. وممكن تستخدم تطبيق زي Wallet أو Moneon على التليفون عشان تسهل على نفسك وعلى عيلتك الموضوع ده.

 

2. حدد أهدافك المالية مع عيلتك

 

جمع عيلتك واتكلم معاهم على أهدافكم للسنة الجديدة زي مثلاً تغيير العربية أو شراء غسالة جديدة أو تجديد المطبخ أو ادخار فلوس لحد من أولادك عشان داخل جامعة أو حتى تسديد قرض أو مديونية عليك. لما بتشارك أفراد عيلتك أهدافك هيساعدوك إنك توصل للهدف بشكل أسرع وهيشيلوا معاك هم المصاريف وتحويش الفلوس.

 

اجتمع بعيلتك كل شهر عشان تعرفوا إن كان في تقدم أو لو محتاج تعدل الميزانية أو حتى للاحتفال بتحقيقك لهدفك الشهري

 

3. حدد مصاريفك الشهرية الجديدة

 

لازم بقى تحدد أنت عايز تصرف أد إيه في الشهر عشان توصل لهدفك اللي أنت حددته. الأول هتحسب أنت عايز تصرف أد إيه في المجمل، بعد كدة هتحدد مصاريف كل فرد في العيلة، ولازم كل واحد يلتزم بالميزانية دي.

 

4. اعمل اجتماع شهري للميزانية

 

اجتمع بعيلتك كل شهر عشان تعرفوا إن كان في تقدم أو لو محتاج تعدل الميزانية أو حتى للاحتفال بتحقيقك لهدفك الشهري.

اختيار المحررين