إزاي تفتح حساب في البنك؟

إزاي تفتح حساب في البنك؟

أول خطوة في بداية حياتك المالية.

شارك

لو محتاج تعمل أي إجراءات في أي مكان من أول الإجراءات الحكومية لغاية التقديم على فيزا سفر، عادة هتحتاج حساب في البنك، ومن الممكن إنك تفتكر إن فتح حساب في البنك ده حاجة معقدة، ولكن في الحقيقة أغلب البنوك بتبقى عايزة عملاء أكتر، حتى لو هم مايعتبروش من العملاء الكبار في البنك. 

فتح حساب في البنك موضوع سهل، كل اللي أنت محتاجه إنك تحدد إيه اللي أنت عايزه من الحساب وإيه المعاملات اللي أنت هتعملها على الحساب.  فلو مثلاً أنت هتخلي الفلوس في البنك من غير ما تعمل فيها حاجة، يبقى ممكن حساب توفير يبقى أفضل ليك، لو متوقع إنك معاملاتك هتحتاج شيكات، يبقى أفضلك تفتح حساب جاري. لو أنت عندك مبلغ مالي كبير جداً مركون على جنب، يبقى أفضل لك تفتح وديعة.

 

فتح حساب في البنك موضوع سهل، كل اللي أنت محتاجه إنك تحدد إيه اللي أنت عايزه من الحساب وإيه المعاملات اللي أنت هتعملها على الحساب.

 

بعد ما تقرر أنت محتاج حساب من أي نوع، يبقى كل اللي أنت محتاجه إنك تشوف أنهي بنك المناسب لك، وده هيعتمد على حاجات كتير زي:

 

1. الحد الأدنى لفتح الحساب، وده بيختلف من بنك للتاني، فلازم تشوف أنت ناوي تحط أد إيه في الحساب، ولازم تعمل حسابك إن الرقم ده بيفضل في الحساب عشان ما تدفعش غرامة لو قل.

 

2. مصاريف البنك، بيبقى في مصاريف سنوية بتدفعها للبنك، لو المصاريف عالية أوي وأنت نسبة استخدامك للحساب قليلة، يبقى كدة مافيش مبرر لفتح الحساب، فلازم تشوف بنك يكون مصاريفه مناسبة لدخلك.

 

3. عدد الفروع وماكينات السحب للبنك وقربها من المناطق اللي أنت بتروحها.

 

4. سهولة الوصول لخدمة العملاء، في أغلب الوقت لما يكون عندك مشكلة أو محتاج تستفسر عن حاجة، هتضطر تلجأ لخدمة العملاء لحل المشكلة، فلو خدمة العملاء مش حلوة، هيبقى في صعوبة كبيرة إنك تحل مشاكلك.

 

هتاخد إيه معاك وأنت نازل تفتح حساب؟

 

1. الرقم القومي أو جواز السفر أو شهادة الميلاد للقصر

 

2. الحد الأدنى لفتح الحساب

 

3. مصاريف فتح الحساب

اختيار المحررين