اعرف أكتر عن نظام المقايضة

اعرف أكتر عن نظام المقايضة

هم كانوا بيستخدموا إيه قبل الفلوس؟

شارك

هل نظام المقايضة كان النظام الوحيد السايد في الماضي؟

 

نظام المقايضة هو واحد من أقدم النظم الاقتصادية، يُقال إن أول استخدام لنظام المقايضة بدأ 6000 سنة قبل الميلاد في ميسوپوتاميا وهي العراق حالياً، العلماء اجتمعوا على إن نظام المقايضة عمره ما كان النظام الوحيد المسيطر اقتصادياً، ولكن كان في عدة نظم متداخلة، ومن ضمنهم استخدام سلعة معينة كنوع من أنواع الفلوس زي الملح أو  الأسلحة البيضاء أو القواقع، حسب كل مجتمع أو بلد.

 

إيه هي أساسيات نظام المقايضة؟

 

نظام المقايضة بيعتمد كلياً على تقييم الطرفين لقيمة السلع والخدمات المتاحة، وعشان كدة فهو برضو بيعتمد على العلاقات الاجتماعية ما بين الناس لإنه بيتطلب ثقة كبيرة في الطرفين لإن من الممكن إن واحد يقايض سلعة بايظة من غير ما التاني يعرف، وجزء كبير من نظام المقايضة بيعتمد على المفاوضة أو المساومة، لإنك لو شاطر، ممكن تقايض سلعة أو خدمة بواحدة تانية قيمتها أعلى، وده اللي في ناس بتحاول تعمله لغاية دلوقتي.

 

في المجتمعات الصغيرة أو وقت الأزمات الاقتصادية، نظام المقايضة بيبقى بديل اجتماعي غير رسمي للفلوس.

 

هل من الممكن نرجع تاني لنظام المقايضة؟

 

نظام المقايضة عمره ما اختفى تماماً، ولكن طبعاً دلوقتي الناس بتعتمد كلياً على الفلوس، بس في المجتمعات الصغيرة أو وقت الأزمات الاقتصادية، نظام المقايضة بيبقى بديل اجتماعي غير رسمي للفلوس، وده اللي حصل في الثلاثينيات في أمريكا وقت الكساد الكبير. وحالياً في المجتمعات الصغيرة، في ناس كتيرة بتعتمد على مقايضة الخدمات عشان يوفروا فلوسهم. ومع ظهور العملات الرقمية زي Bitcoin، في ناس بتعتبر ده التطور المستقبلي لنظام المقايضة.

 

نفسك تبتدي مقايضة؟

 

في ناس بتستخدم مواقع وتطبيقات زي Craigslist وSwapub  و Traderعشان يوسعوا دايرة المقايضة، ويحصلوا على سلع أو خدمات أقيم. كل اللي عليك تعمله إنك تقيم السلع أو الخدمات اللي أنت هتقدمها وبعد كدة تحطها على الموقع وتستنى العروض المقدمة.

اختيار المحررين