ازاي بيأثر على ميزانيتك :الفاست فوود والأكل من بره

تاريخ النشر: في نصايح ببلاش

ازاي بيأثر على ميزانيتك :الفاست فوود والأكل من بره

ازاي تظبط ميزانيتك قبل ماتعمل أوردر الفطار؟

في سلسلة المقالات "ازاي بيأثر على ميزانيتك" هنكتشف بعض البنود اللي بيبقى ليها تأثير على الميزانية ويمكن أنت مش واخد بالك منها، المرة دي هنتكلم عن الأكل من بره. طبعاً الأرقام اللي هتتكتب في المقالات دي، هتبقى أرقام تقريبية، وممكن في الحقيقة الأرقام* دي تقل أو تكتر عن كده.

 

الفطار:

 

أنواع الفطار بتختلف، بس في ناس كتير في مصر بتحب تفطر فول، وطبعاً الأسعار بتختلف من مطعم للتاني.

يعني مثلاً سندويتشين فول من جاد هيكلفوك تقريباً 10 جنيه، في نفس الوقت، لو هتشتري من زوبة مثلاً، نفس السندويتشين دول هيكلفوك 20 جنيه تقريباً، ولو هتشتري من عربية ممكن يكلفوك 6 جنيه تقريباً، عشان كدة المتوسط اللي هتدفعه في الفطار هيبقى 12 جنيه تقريباً.

لو قلنا هتعمل فول في البيت، يبقى هتشتري علبة فول ورغيفين عيش. علبة الفول تقريباً هتكلفك 8 جنيه، بس إحنا بنحسب تمن الوجبة، والعلبة هتعملك على الأقل 4 سندويتشات فول، يعني كل سندويتش هيكلفك 2 جنيه فول، في نفس الوقت كيس عيش لبناني صغير هيكلفك تقريباً 4 جنيه ل8 سندويتشات، يعني هيكلفك 0.5 جنيه للسندويتش، وبكده السندويتشين في البيت بيعملوا 5 جنيه تقريباً.

 

لو أنت هتفطر وتتغدى برة، المتوسط اللي أنت هتصرفه هو 30 جنيه في اليوم على أقل التقديرات، مقابل تكلفة 10 جنيه لو فضلت إنك تعمل أكلك في البيت.

 

الغدا:

 

طبعاً الغدا فيه اختيارات كتيرة، بس مثلاً هنحصر الخيارات دي في طبق كشري، لو هتشتري كشري من مطعم التحرير هيكلفك تقريباً 14 جنيه، ولو جبته من مطعم زي كايرو كيتشن هيكلفك تقريباَ 24 جنيه، ولو جبته من مطعم مش مشهور أوي هيكلفك 12 جنيه تقريباً، يعني متوسط الغدا هيبقى 17 جنيه تقريباً

لو قلنا هتعمله في البيت يبقى هتحتاج كيس رز ومكرونة وعدس وبرطمان صلصة. الحاجات دي من أي هايبر ماركت هتكلفك تقريباً 44 جنيه بس هتعمل تقريباً 10 أطباق كشري، بمعنى إن الطبق هيكلفك 4.5 جنيه تقريباً.

 

الملخص:

 

لو أنت هتفطر وتتغدى برة، المتوسط اللي أنت هتصرفه هو 30 جنيه في اليوم على أقل التقديرات، مقابل تكلفة 10 جنيه لو فضلت إنك تعمل أكلك في البيت.

 

إزاي الكلام ده هيأثر على ميزانيتك؟

 

لو أنت مرتبك 3000 جنيه في الشهر، وهتاكل من بره كل يوم شغل، يبقى أنت كدة هتصرف 750 جنيه تقريباً كل شهر على الأكل، مقابل 250 جنيه لو قررت تعمل أكلك في البيت، يعني لو هتاكل من بره، هتصرف على أقل 25% من مرتبك على الأكل، في مقابل صرف 10% بس من مرتبك في الشهر لو هتاكل من البيت.

 

*إحنا برضو مش حاسبين الضرايب زي الضريبة المضافة، أو مثلاً تمن التوابل، وهكذا، دي كلها أرقام تقريبية، والحقيقة طبعاً هتبقى مختلفة.


اختيار المحررين