إزاي تعمل حساب توفير للطواريء وامتى تستخدمه

إزاي تعمل حساب توفير للطواريء وامتى تستخدمه

القرش الأبيض ينفع في اليوم الاسود

شارك

حساب التوفير للطواريء ممكن يكون أهم حاجة تقدر تعملها لنفسك علشان تضمن إنك دايماً تكون مطمن ومش شايل هم إن لو حصل حاجة خارجة عن إرادتك هتقدر تتصرف إزاي.

 

إزاي تعمل حساب توفير للطواريء؟

 

حساب التوفير للطواريء ممكن ما تقدرش تحط فيه فلوس كتير على طول، ولكن هو الأول بيبتدي بمبالغ صغيرة لغاية ما توصل للرقم اللي أنت عايزه. أغلب الخبراء بينصحوا إن يكون عندك مبلغ مالي يكفي 6 شهور من مصاريفك الأساسية، واللي هي إيجار أو مصاريف البيت اللي أنت عايش فيه + مصاريف الأكل + مصاريف المواصلات + مصاريف طبية زي أدوية أو زيارات للدكتور، وما بتعملش حساب أي مصاريف مش أساسية أو أنت مش محتاجها.

 

- أول خطوة هي إنك توفر على الأقل 20% من مرتبك وتحطهم على جنب.

- أول ما تجمع مبلغ كافي إنك تفتح حساب في البنك، خد الفلوس وحطها في الحساب، وكل شهر حط الـ20% اللي بتوفرهم من مرتبك في الحساب ده وما تجيش جنبه أبداً.

- لو وصلت للمبلغ اللي أنت عايزه ولقيت إنك مش هتحتاج الفلوس دي دلوقت، ممكن تحطهم كوديعة في البنك عشان تاخد عليهم فوايد أكبر، وميزة الوديعة إنها ممكن كسرها بسهولة أكبر من شهادة التوفير، وبتبقى مدتها أقصر، وبرضو استمر في توفير 20% من مرتبك وحطه في حساب التوفير.

 

لازم تعتبر إن الحساب ده زي التأمين بتاعك ضد المشاكل اللي أنت مش متوقعها، وبكدة هتكون مستريح ومش قلقان طول الوقت

 

امتى تستخدم حساب التوفير للطواريء؟

 

الحساب ده للطواريء بس، يعني ما تستخدمش ولا جنيه منه إلا لو فعلاً ما فيش حل تاني، بعض الحالات اللي ممكن تستخدم فيها الفلوس اللي في حساب الطواريء:

  1. في حالة إنك فقدت وظيفتك.
  2. محتاج الفلوس لمصاريف طبية طارئة.
  3. أي مصاريف متعلقة بكوارث طبيعية.

في الآخر، لازم تعتبر إن الحساب ده زي التأمين بتاعك ضد المشاكل اللي أنت مش متوقعها، وبكدة هتكون مستريح ومش قلقان طول الوقت.

اختيار المحررين