مركز المساعدة الخاص بالمنتجات | بطاقات الائتمان | فايدتي

اهلا بيك فى مركز المساعدة

دور فى المقالات الى تحت هتلاقيها بترد على أغلبية أسئلتك، و لو ملقتش اللي بتدور عليه ابعتلنا رسالة

Question

بطاقات الائتمان

يعني ايه بطاقة ائتمان؟

بطاقة الائتمان هي بطاقة دفع عن طريق فلوس البنك بيسلفهالك تقدر عن طريقها تشتري احتياجاتك من غير فلوس كاش على شكل قرض صغير، ومن أهم مميزات الكريدت كارد:

  • الحد الائتماني: هو بيتراوح بين 2 لـ 3 أضعاف صافي دخلك وده بيختلف حسب البنك اللي هتاخد منه الكارد والمنتجات البنكية اللي بتستخدمها.
  • شبكة الدفع: هي الأماكن اللي بتسمحلك تستخدم فيها الكريدت كارد بتاعك، وأكبر شبكتين دفع هما فيزا و ماستر كارد ومعظم البطاقات الموجودة دلوقتي هي بيتم إصدارها من الشبكتين دول. 
  • نظام المكافآت: معظم أنظمة المكافآت بتكون واحدة من تلات حاجات: 1- كاش باك  2- قسائم شراء 3- أميال للسفر 

هل بطاقات الائتمان آمنة للاستخدام؟

في معاملات سنوية بتتم عن طريق الكريدت كارد بأكتر من 3 تريليون دولار أمريكي، وده عشان الناس متقبلة استخدامها بشكل كبير، وبيمثل الاحتيال أو النصب في بطاقات الائتمان حوالي 1% بس من إجمالي المعاملات، وعشان كده استخدام الكريدت كارد آمن بشكل كبير.

بطاقات الائتمان عندها أنظمة حماية للحد من السرقة:

  • الـ CVV: ده رقم حماية موجود في ضهر الكارد، و هتلاقيه مكتوب بعد رقم الكارد.
  • كلمة المرور لمرة واحدة "OTP": معظم المعاملات الالكترونية اللي بتتم من خلال الكريدت كارد بتطلب منك

 الـ "OTP" اللي بتتبعت من البنك على موبايلك لتأكيد عملية الدفع وده طبعاً لزيادة الأمان.

  • الشريحة: معظم بطاقات الائتمان الجديدة بتحتوي على شريحة وهي دي المسئولة عن الرقم السري اللي بيتطلب منك وقت الدفع.
  • البنك: البنوك ليها دور كبير في تقليل المخاطرة عن طريق مراقبة المعاملات و التأكد ان معلومات العميل هي نفس معلومات صاحب الكارد ( زي السؤال عن العنوان ورقم الموبايل وقت الدفع اونلاين)

من أهم عوامل الأمان لاستخدام بطاقات الائتمان هي طريقة استخدامك، وعشان كده فيه قواعد للأمان لازم تتبعها:

  • ماتديش رقم الكارد بتاعك لأي حد.
  • ماتقولش الرقم السري بتاعك لأي حد.
  • ماتستخدمش الكريدت كارد بتاعك في المدفوعات الاونلاين في مواقع ماتعرفهاش.

هو انا بتحاسب على الفايدة بعد ما بشتري الحاجة على طول؟

الإجابة هي لأ، انت مش بيتحسب عليك فايدة في نفس يوم الشراء، معظم البنوك بتدي فترة سماح بتتراوح بين55 لـ 58 يوم، بس الفترة دي مش بتتحسب من يوم آخر معاملة تمت بالكريدت كارد، الفترة دي معظم البنوك بتحسبها عليك من أول يوم في الشهر.

ايه هي الاوراق المطلوبة؟

الأوراق المطلوبة للكريدت كارد بتختلف حسب نوع وظيفتك و البنك اللى هيديك الكارد، وهتلاقي هنا الاوراق المطلوبة في معظم البنوك :

  • عام (للكل)
    • بطاقة الرقم القومي أو جواز سفر
    • إثبات للعنوان (إيصال مرافق)
  • للموظفين:
    • خطاب مفردات مرتب من الشركة (موضح به تاريخ التوظيف,صافى الراتب,المنصب الحالى)
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
  • لأصحاب الأعمال المهنية:
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
    • كارنيه نقابه
    • شهاده مزاوله المهنه ( اذا توفر)
    • بطاقة ضريبية
  • لأصحاب الأعمال الحرة:
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
    • سجل تجارى
    • بطاقة ضريبية

هي بطاقة الائتمان تكلفتها قد ايه؟

في تلات حاجات لازم تعمل حسابهم لما تيجي تحدد تكلفة الكريدت كارد:

  1. سعر الفايدة: (عشان تعرف معلومات أكتر عن سعر الفايدة ادخل القسم الخاص بسعر الفايدة في مركز المساعدة https://www.faydety.com/save/cards) سعر الفايدة هو واحد من عوامل التكلفة لما تقدم على كريدت كارد، بس ده يعتمد في الأساس على طريقة استخدامك للكارد، لوانت بتسدد المديونية اللي عليك بانتظام سعر الفايدة مش هيكون مشكلة بالنسبالك، لكن لو سبت الديون تتراكم عليك كده هيتحسب عليك سعر الفايدة، خليك فاكر ان سعر الفايدة في الكريدت كارد بتتحسب شهرياً مش سنوياً ، عشان كده ممكن يبان ان سعر الفايدة في الكريدت كارد أقل من القروض ولكن في الحقيقة هي أغلى.
  2. مصاريف الاصدار: دي مصاريف بتدفعها للبنك في الأول عشان تطلع الكريدت كارد، ودي مش بس بتختلف من بنك لبنك دي كمان بتختلف حسب نوع الكارد.
  3. مصاريف التجديد: لما الكارد ينتهي صلاحيته بتدفع مصاريف عشان تجدده.

ازاي اقدم على بطاقة ائتمان؟

ممكن تقدم على كريدت كارد/credit card من خلال انك تتصل بالبنك أو تزور أقرب فرع وموظف البنك هيعرفك الخطوات.

أو قدّم أونلاين

دلوقتي تقدر تقدم أونلاين على كريدت كارد/credit card  عن طريق فايدتي بسهولة من البيت، الشغل أو حتى الكافيه، في دقايق ببلاش، دوس هنا عشان تقدم بعد ماتقارن كل التفاصيل (https://www.faydety.com/save/cards).

بلوج فايدتي

عايز تعرف عن عالم المال و ازاى بيأثر عليك؟ ادخل وافهم عن طريق المقالات بتاعتنا