أوفر ٥ أفراح فى السينما المصرية

تاريخ النشر: في طرائف وعجائب

أوفر ٥ أفراح فى السينما المصرية

خد فكرة توفر بيها في فرحك من الأفلام

اللي داخل على جواز بيبقى عارف ان وراه هم مايتلم من أقساط شقة لعفش ده غير الشبكة والمهر، وكله كوم ومصاريف الفرح كوم تاني والخناقات بتاعت هيتعمل فين؟ ومين هيتعزم؟ وفستان العروسة ايجار ولا تفصيل؟ لو ركزنا فى السينما المصرية هنلاقي ان فى افلام حلت المشكلة دي وعملوا افراح على الضيق بمصاريف بسيطة، لو داخل على جواز راجع الافلام دي يمكن تطلع منهم بفكرة تحل زنقتك.

 

١-جواز بقرار جمهوري

 

الموضوع ابتدي بخناقة ما بين عمرو وريهام على نوع السطح اللي هيعملوا فيه الفرح، سطح بيتهم ولا سطح باخرة، وبعدين عاندوا على المعازيم لغاية ما وصلت لرئيس الجمهورية، وبما أن الرئيس حضر فأكيد رئاسة الجمهورية كان لازم تتكفل بكل حاجة لأشهر فرح فى مصر، والعيلتين في الاخر متكلفوش مليم. لو ناوي تقلدهم محتاج بس تعرف عنوان الرئيس.

  • القاعة: فى الحارة
  • المعازيم: رئيس الجمهورية، وأهل الحارة والشوارع القريبة
  • فستان العروسة وبدلة الفرح: على رئاسة الجمهورية
  • البوفيه: على رئاسة الجمهورية برضه



 

٢-سيد العاطفي

 

أم سيد قالت لعروسة ابنها: " وافقي أنتي بس يا داليا وأنا اعملكم فرح مصر كلها تحكي عنه" وطلعت قد كلمتها وعملتلهم فرح مصر كلها حضرته فى الاستاد والماتش شغال، تقريبا مدفعوش غير تمن ايجار الفستان والبدلة وتذاكر الماتش. مفتكرش أن في حد ممكن يرفض الدعوة على فرح زي ده خصوصا أنه مليان أغاني وترقيص ولعبة حلوة طول الفرح. نصيحة ليك لو عايز تقلدهم بلاش ماتشات الأهلي والزمالك عشان الليله تعدي على خير.

  • القاعة: استاد القاهرة
  • المعازيم: كل المشجعين فى الاستاد والجمهور اللي بيتفرجوا علي التلفزيون
  • فستان العروسة وبدلة الفرح: ال٢ إيجار 
  • البوفيه: محدش جاب سيرته

 

القاعة كانت الاستاد والمعازيم كانوا الجمهور في الاستاد وقدام التلفزيون

 

٣-تيتة رهيبة

 

رؤوف غلبان ومبيقدرش يعترض على كلام تيتة، ومنار كمان طيبة وعايزة تعيش فـ مكنش فى اعتراض من الكل الأطراف على الفرح اللي في البيت زي أفراح السبعينات، كل اللي عملوه أنهم حطوا كوشة في الصالون وعزموا القريبين بس، مع بوفيه على الأد وأغاني أفراح جنائزية الماني على الآيباد بتاع تيتة. المميز فى الفرح ده أنه خلص بسرعة بسبب اختلاف أذواق المعازيم في الأغاني. 

  • القاعة: صالة بيت رؤوف
  • المعازيم: أقل من ٥٠ فرد
  • فستان العروسة وبدلة الفرح: ال٢ إيجار 
  • البوفيه: بوفيه هاى تى



 

٤-عايز حقي

 

صابر من بعد ما قرأ الدستور بقي شايف ان كل حاجة فى البلد ملكية عامة فقرر يشارك فرحته مع كل شركائه فى البلد، أجر ٣ عربيات نقل، عربية للكوشة، وواحدة للرقاصة، والتالتة للمعازيم والبوفيه، ولف القاهرة كلها بالفرح، هو بصراحة فرح مكلف، يعني إيجار ال٣ عربيات مع أجرة الرقاصة والفرقة بتاعتها ده غير البوفيه وتمن إيجار البدلة وفستان العروسة، بس برضه يعتبر رخيص جدا بالمقارنة بتأجير القاعات كفاية أنه محدد عدد المعازيم، بصراحة الفكرة عبقرية متتقدرش بتمن.

  • القاعة: ٣ عربيات نقل
  • المعازيم: أقل من ٥٠ فرد
  • فستان العروسة وبدلة الفرح: ال٢ إيجار
  • البوفيه: غدا بيتي من عند العريس



 

٥-أمير البحار

 

هو اللي يشوف فرح أمير وسلوي يقول أنهم صرفين ومكلفين وفرح على مركب وحاجة شياكة أوي، لكن الحقيقة دي مركب أبو أمير وكده كده مش بتاخد ناس كتير هو على قد أخوات أمير البنات والقراصنة، بس طبعا كان لازم لمسة الشياكة بشوية الأنوار مع فساتين العروسة وأمها وأم العريس، بس برضه لو حسبناها بالمقارنة بوظيفة أبو العريس رجل الأعمال وأبو العروسة القبطان هنلاقي ان الموضوع فى على الأد.

  • القاعة: مركب أبو العريس
  • المعازيم: الأهل والأصحاب القريبين، والقراصنة اللي خاطفينهم
  • فستان العروسة وبدلة الفرح: متفصلين مخصوص
  • البوفيه: أكيد من أغلى فنادق اسكندرية