ازاي ساندويتش الكبدة بـ3 جنيه: هي دي كبدة ايه؟!

سؤال دايمًا بيشغلنا لما بناكل كبدة ع العربية في منطقة شعبية.. هل ساندويتش الكبدة أبو 3 جنيه حقيقي ولا مغشوش؟! بص هو الأكيد إنها مش كبدة بلدي بس هي ايه بالظبط دا اللي هتعرفه بلغة الأرقام دلوقتي.

ودا كان فكرة فيديو للفلوجر المصري المعروف كريم السيد، ودي صفحته على فيسبوك

أسعار الكبدة واللحمة المفرومة

·       كيلو الكبدة البرازيلي 56 جنيه.

·       كيلو اللحمة المفرومة البرازيلي 80 جنيه.

·       كيلو الكبدة البلدي الخالص بـ 180 جنيه.

·       كيلو الكبدة الكندوز "عليه قلب وكلاوي" بـ 160 جنيه.

·       كيلو اللحمة المفرومة البلدي بـ 120 جنيه.

الأكيد إن عربيات الكبدة مش بتشتغل بالكبدة واللحمة البلدي لكن الأقرب البرازيلي، وممكن كمان يجيبوها بأسعار أفضل من كدا مع الكميات.

هنشتري ساندويتشات بتمن كيلو

·       ساندويتش الكبدة بـ 3 جنيه ولو اشترينا 19 رغيف هيكلفوا 57 جنيه يعني كيلو كبدة برازيلي تقريبًا.

·       رغيف الحواوشي السادة بـ 10 جنيه لو اشترينا 8 أرغفة هيكلفوا 80 جنيه يعني كيلو لحمة مفروم برازيلي.

وزن الساندويتشات على الميزان

·       لو فضينا الكبدة اللي في الـ 19 ساندويتش هيطلعوا تقريبًا 433 جرام يعني أقل من نص كيلو.

·       ولو فضينا اللحمة المفرومة اللي في أرغفة الحواوشي هتطلع اللحمة وزنها 650 جرام يعني أكتر من نص كيلو بـ 150 جرام.

"مع مراعاة وجود التحابيش زي الفلفل المتقطع والبهارات في سندويتشات الكبدة، والبصل في الحواوشي - يعني كمان الأوزان اللي طالعة من الكبدة واللحمة المفرومة مش خالصة"

ودا شئ يخليك مستريح شوية لأن لو الوزن طلع أكتر من كيلو كانت هتبقى مخيفة وأكيد بناكل كبدة حيوان مش معروف أصله ولا فاصله ايه!

طيب هل عربيات الكبدة بتكسب؟

في الحالة دي وبلغة الأرقام لما يستخدموا الكبدة البرازيلي آه بيكسبوا، والمكسب بيكون قليل لكن مع بيع أكبر عدد من الساندويتشات بيكون في مكسب كويس.

·       433 جرام كبدة سعرهم 24 جنيه يعني مكسبه حوالي 33 جنيه في كيلو الكبدة.

·       650 جرام لحمة مفرومة سعرهم 52 جنيه تقريبًا يعني مكسبه في كيلو اللحمة المفرومة البرازيلي حوالي 28 جنيه.

كدا وعرفنا ازاي ساندويتش الكبدة اللي بـ 3 جنيه بيكسب ازاي طب لو بـ 2 جنيه؟!

قبل كدا كانت شعبة القصابين "اللحوم" في غرفة القاهرة التجارية حذرت من انتشار ظاهرة بيع ساندويتشات الكبدة اللي بـ 2 جنيه وقالوا إن دا بنسبة كبيرة جدًا بيكون عبارة عن رايش الكبدة مع الماية والدهون اللي بتتقطع عليها والبهارات هي اللي بتمنع الريحة الزفرة وبتديها طعم.

خلي بالك!

يعني من الاخر لو ساندويتش الكبدة أقل من 3 جنيه لازم تقلق  وتتأكد إن اللي بتاكلها غالبًا كبدة مغشوشة وعبارة عن دهون ودم ورايش وعليها بهارات.

ورغيف الحواوشي اللي أقل من 10 جنيه، في أماكن كتير بـ  5 جنيه، بيكون في حاجة غلط مش لحمة بلدي ولا برازيلي وغالبًا بتكون بواقي الدبيحة مع البهارات فالطعم بيظبط.

نصيحتنا ليك حاول تقلل استهلاكك من النوع دا من الأكل الشعبي منعًا للتسمم والمشاكل الصحية المختلفة خليه تفاريحي مش كل يوم.

 ساندويتشات الكبدة من أرخص الأكلات في القاهرة لكن تقدر تعرف أكلات رخيصة أكتر من هنا، أرخص أنواع أكل في القاهرة