اعرف أكتر عن تاريخ طرق الملاحة | فايدتي

اعرف أكتر عن تاريخ طرق الملاحة

تاريخ النشر: في طرائف وعجائب

اعرف أكتر عن تاريخ طرق الملاحة

البحر كان من أهم وسايل التجار في نقل البضائع.

الملاحة كانت جزء مهم من تطوير التاريخ البشري، عن طريق الملاحة، الحضارات االمختلفة قدرت تتفاعل مع بعض سواء عن طريق التجارة أو الحروب، وتطوير السفن هي اللي سمحت للإنسان إنه يطلع برة الحيز بتاعه، ويستكشف حتت تانية في العالم. 

 

أقدم سفن في العالم:

 

أقدم دلائل لاقوها علماء الأثار بالنسبة للمراكب بترجع للعصر الحجري، وكان مركب تجديف صغير، ولكن يُقال إن أول السفن ملاحية اللي كانت بتعدي بحار كانت في العصر الفرعوني، ولكن في نفس الوقت أغلب الحضارات كانت معتمدة على السفن الملاحية بغرض التجارة، زي الهند وتركيا واليونان، وبلاد إسكندنافيا وغيرهم.

 

طرق ملاحية تاريخية:

 

في طرق ملاحية تاريخية معروفة، وتم تحديدهم لتسهيل التجارة ما بين البلاد، وبعض أمثلة الطرق دي هي:

 

في ناس كتير بتربط ما بين قناة السويس ونهاية عصر السفن الشراعية.

 

طريق الحرير:

 

يُقال إنها من أقدم الطرق الملاحية اللي تم تحديدها في القرن الثاني قبل الميلاد، وكانت شبكة الطرق دي بتربط ما بين الشرق والغرب لإنها كانت بتوصل ما بين بلاد شرق أسيا وبلاد أوروبا، مروراً بشبه الجزيرة العربية وأفريقيا، وفي نظرية بترجح إن الطاعون انتشر بسبب شبكة طرق تجارة الحرير وإنه طلع من أوروبا ووصل بلاد أسيا على عكس نظريات قديمة كانت بترجح إن أساس الطاعون كان في أسيا.

 

طريق رأس رجاء الصالح: 

 

كلنا بنستخدم جملة "رأس رجاء الصالح" لما نحس إن إحنا قعدنا نلف حوالين نفسنا، ولكن في الحقيقة رأس رجاء الصالح كان طريق ملاحي مهم جداً وبديل لطريق الحرير لإن بعد ما القسطنطينية بقت تابعة للعثمانين في 1453، الأوروبيون كانوا مش عارفين يشحنوا بضايعهم بسبب إن العثمانيين كانوا بيعتبروا أعدائهم في الفترة دي، وكان طريق الحرير بيعتمد على المرور من قسطنطينية للوصول لأوروبا، وبعد كدة المستكشف البرتغالي بيدرو ألفاريز كابرال لقى طريق رأس رجاء الصالح بالصدفة، ووجد إنه بيربط ما بين الهند وأوروبا عن طريق إنه يلف حوالين أفريقيا، وده كان طريق التجارة الأساسي لغاية ما اتفتحت قناة السويس في 1869.

 

قناة السويس:

 

لما قناة السويس اتفتحت في 1869 وصلت المحيط الهندي بالاطلنطي عن طريق البحر المتوسط، وكانت بديل أقصر لطريق رأس رجاء الصالح، ولكن في نفس الوقت، الرياح في قناة السويس كانت ضعيفة فكان الطريق مناسب بس للسفن البخارية، ولكن السفن الشراعية كانت صعب إنها تعدي من قناة السويس، وكانت برضو لسط بتعتمد على طريق رأس رجاء الصالح. بس في نفس الوقت، العالم كان بشهد طفرة صناعية أدت للاعتماد على المحركات، وقل الاعتماد الكلي على السفن الشراعية، عشان كدة في ناس كتير بتربط ما بين قناة السويس ونهاية عصر السفن الشراعية.