اعرف سر شقة الزمالك اللي اتعرفت بـ مغارة علي بابا

تاريخ النشر: في طرائف وعجائب

اعرف سر شقة الزمالك اللي اتعرفت بـ مغارة علي بابا

اعرف السر ورا اكتشاف أثار في شقة الزمالك!

تخيل معايا ان مغارة علي بابا موجودة فى العصر الحديث، وبدل كلمة السر، " افتح ياسمسم"، فى مفتاح هيوصلك للكنوز فى ثواني، ده بالظبط اللي لقوه فى شقة الزمالك المشهورة.

 

الحكاية بدأت بـ خلاف عائلي على 11 مليون جنيه بين نائب سابق وابن مستشار وده اللى نشرته مواقع  كتير ومن اهمهم موقع  Sky News، واتحكم ضد ابن المستشار بدفع المبلغ، ومن هنا ظهرت المفاجأة لما إدارة تنفيذ الأحكام راحت بيته ولقوا فيه حوالي 2000 قطعة أثرية، 878 منها كانت ملك أسرة محمد علي، والجزء التاني حوالي 1204 قطعة وبيرجع للحضارة المصرية القديمة والعصر الإسلامي، ده غير بعض اللوحات اللي وصل تمن بعضها لـ 700 ألف جنيه استرليني.

 

 

ايه علاقة ملاك الشقة بالآثار؟

 

في كلام كتير اتقال عن ملكية أصحاب شقة الزمالك للقطع الأثرية، وأجدد خبر اتقال على لسان المحامي بتاعهم واللي كتبه موقع مصراوي، أن معظم اللوح الفنية والقطع الأثرية كانت في شنط متفتحتش من 30 سنة، سابتها والدة زوجة المستشار وميعرفوش عنها حاجه من وقتها، ده غير أن الشقة متفتحتش من سنتين، ولسه مفيش خبر مؤكد عن مصدر القطع دي.

 

 

معظم اللوح الفنية والقطع الأثرية كانت في شنط متفتحتش من 30 سنة، سابتها والدة زوجة المستشار وميعرفوش عنها حاجه من وقتها

 

 

قيمة مقتنيات شقة الزمالك!

 

وعلى حسب اللي نشرته جريدة اليوم السابع, أنهم كمان لقوا حوالي 3707 قطعة منهم 2907 قطعة من الدهب الاصفر، والأبيض، والماس، وأحجار كريمة، و800 قطعة اكسسوارعالي الجودة، وطبعا لو حسبنا قيمة الدهب دلوقتي هنلاقيها زادت كتير عن زمان، تفتكر قيمة الدهب اللى موجود في شقة الزمالك يساوي كام دلوقتي؟