الزمالك عرض كام على أبو جبل والنصر السعودي هيدفعله كام؟

كلام كتير جدًا خلال الفترة الأخيرة عن حارس مرمى نادي الزمالك، أبو جبل، ومستقبله هل هيكمل مع القلعة البيضاء ولا لا، وكان في تقارير صحفية كتير اتكلمت عن الشك في إنه ممكن يجدد مع الزمالك خاصة إن الموسم دا الأخير له في عقده وكمان طلباته المالية كبيرة وطلب بإنه يتساوى مع زميله في الفرق محمد عواد.

تقارير صحفية كانت قالت إن أبو جبل طلب من إدارة الزمالك لتجديد عقده إنه يحصل في الموسم على 15 مليون جنيه، وتقارير تانية قالت 18 مليون جنيه لكن المفاوضات ماوصلتش لحاجة ودا اللي خلى أبو جبل يمضي لنادي النصر السعودي.

أبو جبل هياخد كام مع نادي النصر السعودي؟

حسب الأخبار اللي نقلتها المواقع الرياضية في مصر، أبو جبل هيحصل على قيمة 2 مليون دولار أمريكي في السنة "يعني أكتر من 31 مليون جنيه مصري"، ومضى لمدة موسمين في صفقة انتقال حر لأن زي ما قولنا دا الموسم الأخير له في عقده مع الزمالك، وبالتالي الزمالك مش هيقدر يستفاد منه.

2 مليون دولار في الموسم قيمة عقد أبو جبل مع النصر السعودي

أبو جبل وقع على العقود

وحسب التقارير الرياضة، أبو جبل عقد جلسة مع المسئولين في نادي النصر السعودي ووقع على عقود انضمامه لمدة موسمين، وبالتالي بنهاية الموسم الحالي هيروح أبو جبل في صفقة انتقال حر للسعودية.

لو رجعنا بالتاريخ لورا شوية هنلاقي إن نادي النصر السعودي كان عينه على حارس مرمى الزمالك أبو جل وكان بيفكر جديًا في التعاقد معاه لكن بعد مباراة 5/3 اللي خسرها الزمالك قدام المارد الأحمر الأهلي تراجعت إدارة نادي النصر عن فكرة التعاقد مع الحارس.

أبو جبل نجمه لمع

لكن بعد الأداء اللي ظهر بيه أبو جبل في بطولة كأس الأمم الأفريقية الأخيرة، اللي اتلعبت في الكاميرون ووصل المنتخب المصري للمباراة النهائية وخسر وحقق المركز التاني، رجعت إدارة نادي النصر السعودي من جديد للتفكير في التعاقد مع جبل.

وأخيرًا توصلوا لاتفاق بين الطرفين ووقع أبو جبل على عقد مدته موسمين بداية من الموسم الجاي لكن حارس مرمى الزمالك ماقلش دا بشكل رسمي إنه وقع للنصر السعودي.

تجميد أبو جبل

ونادي الزمالك بيفكر يجمد أبو جبل لو اتأكد من المعلومة إنه مضى مع النصر السعودي، وخلال الأيام الجاية الأمور هتكون واضحة بشكل أكبر.

الزمالك عرض كام على أبو جبل للتجديد؟

حب اللي نقلته الصحافة فإدارة الزمالك رصدت مبلغ 12 مليون جنيه في الموسم الواحد للحارس مقابل التجديد، لكن أبو جبل رفض العرض وطلب زيادته إلي 15 مليون جنيه في الموسم الواحد وكمان يكون العقد لمدة 4 مواسم.