بعد ما جوني كسب القضية: 7 طرق أمبر تجيب منها فلوس التعويض

قضية جوني ديب وأمبر هيرد اللي العالم كله بيتابعها حاليًا اتحكم فيها، امبارح الأربعاء، بحكم قضائي لصالح نجم هوليوود، وردت أمبر هيرد على الحكم ببيان، والحكم كان إلزام أمبر هيرد إنها تدفع لجوني ديب 15 مليون دولار كتعويض.

طبعًا أمبر هيرد كانت مصدومة، وكمان تقارير كتير اتكلمت عن ثروتها، حسب ما استعرضت مجلة بيزنس ريبورت، بتترواح بين 2.5 مليون دولار و8 ملايين دولار، طيب ايه اللي ممكن يحصل وهل أمبر هيرد هتقدر تدفع التعويض ولا لا ومنين تجيب فلوس التعويض؟ 

محكامة استمرت لـ 6 أسابيع

خلينا نقولك إن المحاكمة في قضية جوني ديب وأمبر هيرد استمرت لمدة 6 أسابيع، وكمان كان في مداولات بين المحلفين استمرت لمدة 3 أيام، وفي نهاية الأمر حكمت المحكمة لصالح جوني ديب بمنحه 10 ملايين دولار كتعويضات و 5 ملايين دولار كتعويضات عقابية. 

وبالنسبة لأمبر هيرد المحكمة قررت إنها تديلها حكم بالحصول على 2 مليون دولار من جوني ديب كتعويض عن الأضرار ودون تعويضات عقابية.

ليه المحكمة أخدت قرار ضد أمبر هيرد؟

هيئة المحلفين قالت إن تصريحات أمبر هيرد حول زواجها كانت "كاذبة" وتحمل طابعًا تشهيريًا، وأنها تصرفت بـ "حقد حقيقي".

ايه اللي هيحصل مع أمبر هيرد الفترة الجاية؟

خسائر أمبر هيرد مش بس هتكون مادية وهتكون ملزمة تدفع قيمة التعويض لا دا كمان الحكم هيأثر على حياتها الفنية في هوليوود.

وحسب التقارير من الممكن إنها ما يتمش الاستعانة بها الفترة الجاية في أي عمل فني خاصة في الجزء الثاني من فيلم "أكوامان 2".

مداولات قبل إعلان الحكم

هيئة المحلفين تداولت كل ملابسات القضيتين لمدة ثلاثة أيام قبل أن تعلن قبل الساعة 5 مساء يوم الأربعاء بتوقيت أمريكا عن أنها توصلت إلى حكم.

وتداول المحلفون 42 سؤالاً بدقة شديدة لكي يقرروا ما إذا كانت، أمبر هيرد قد شوهت سمعة جوني في مقالها الافتتاحي في واشنطن بوست عام 2018 حول الإساءة للنساء والعنف المنزلي.

القصة بدأت منين؟

في 2018: القصة بدأت لما جوني ديب رفع دعوى قضائية ضد أمبر هيرد بتهمة التشهير بعد ما كتبت مقال لصحيفة واشنطن بوست، واتكلمت فيه عن التغلب على العنف المنزلي.

ورفع جوني ديب في البداية دعوى قضائية ضد أمبر مقابل 50 مليون دولار فردت عليه بقضية تعويض مقدارها 100 مليون دولار.

 

أمبر هيرد هتجيب فلوس منين علشان تدفع تعويض جوني ديب؟ 7 طرق

ممكن تستأنف الحكم والمبلغ يقل، وغالبًا مفيش بنك هيخاطر إنه يديها قرض علشان شغلها موقوف وسمعتها الفنية في الأرض ممكن تعمل كدا:

1- هتستلف من صديقها إيلون ماسك، وطبعًا مش هييجي في ثروته حاجة ايه يعني 15 مليون دولار.

2- تعمل Career Shift وتشتغل في البيتكوين، وتخلي إيلون ماسك يساعدها في حياتها المهنية.

3- هتعمل حملة تبرعات في أمريكا للسيدات المتعاطفين مع قضيتها.

4- ممكن تكلم ساويرس علشان يستضيفها في مهرجان الجونة، وتبدأ رحلتها في السينما المصرية بقى.

5- السبكي ياخد خبر ويتبناها فنيًا وتعمل الجزء التاني من "أيظن".

6- تدخل في "الراب سين" وتدس جوني ديب وتحقق أرباح من المشاهدات.

7- تعمل قناة على يوتيوب وتعلم الناس الفنون القتالية.