تاريخ البريد المصري، من الرسايل والطوابع لخدمة UGOTBOX!

تاريخ النشر: في طرائف وعجائب

تاريخ البريد المصري، من الرسايل والطوابع لخدمة UGOTBOX!

البريد المصري مش جوابات وبس!

البريد المصري كان وسيلة نقل الجوابات الوحيدة اللي كانت موجودة معانا من زمان من قبل الواتساب أو الماسنجر،وبالرغم أن مهمته الأساسية مابقتش بنفس الأهمية بتاعة زمان، لكن لسه البريد المصري ليه دور كبير وبيطور من خدماته بشكل مستمر عشان مايفضلش بس مقتصر على الجوابات.

ويعتبر يوم 9 أكتوبر "اليوم العالمي للبريد"، وده حسب اختيار اتحاد البريد العالمي خلال مؤتمر الاتحاد بمدينة طوكيو سنة 1969 وتم إعلانه يوم عالمي للبريد بمناسبة ذكرى تأسيس الاتحاد في العاصمة السويسرية بيرن، عشان كده هنتكلم النهاردة عن البريد المصري.

 

تاريخ هيئة البريد المصري:

 

توصيل الرسائل كان موجود على مر العصور من أيام الفراعنة لما كانوا بيوصلوا الرسائل المحلية على ضفاف النيل و الرسائل الدولية على طريق خط سير الجيوش والقوافل، وتعتبر أقدم وثيقة وجدت مذكور فيها اسم البريد سنة 2000 ق.م وكانت فيها وصية كاتب لوالده بيحكيله فيها عن أهمية الكتابة والمستقبل في العمل الحكومي.

 

وبداية مؤسسة البريد الحديثة في بلاد الشام بترجع لواحد إيطالي في الإسكندرية اسمه "كارلو ميراتي" اللي أسس إدارة بريدية بشكل خاص مهمتها إرسال واستلام الجوابات مع البلاد الأجنبية، وكان مهمته تصدير وتوزيع الرسائل مقابل أجر وسماها "البوستة الأوروبية"، ووقتها الخديوي إسماعيل عرف أهمية "البوستة الأوربية" فـ اشتراها من "كارلو ميراتي" في 29 أكتوبر 1864، واتنقلت الملكية للحكومة المصرية يوم 2 يناير 1865 وده يعتبر يوم تاريخي وعيد للبريد المصري بيتم الاحتفال بيه كل سنة.

 

وفي سنة 1966 أصدر الرئيس جمال عبد الناصر قرار بانشاء الهيئة العامة للبريد واتنقلت من وزارة المالية لوزارة المواصلات لحد سنة 1999 تم تأسيس وزارة الاتصالات والمعلومات وبقى مهمتها الإشراف على الهيئة القومية للبريد وده ساهم في تحديث خدمات البريد المصري وتقديمها بشكل فيه كفاءة أكبر. 

 

من خدمات البريد المصري المالية:

 

  • استخراج كارت المدفوعات، الحكومية (فيزا ايزي باي).
  • خدمة التوفير.
  • إرسال واستقبال الحوالات.
  • صرف المعاشات .
  • التوفير.
  • الحساب الجاري.

 

أجدد خدمات البريد:
 

 الخدمة الجديدة اللي بيقدمها البريد هي UGOTBOX، وهي باختصار عبارة عن عنوان في امريكا بتبعت عليه أي منتج بتشتريه من بره مصر وهما هيجمعوا اوردراتك ويبعتوها بتكاليف شحن أوفر.

 

سر حساب عدد الكيلوات بين المحافظات!

 

كلنا بنشوف على طرق السفر اكتر من لوحة مكتوب عليهم جمل زي "القاهرة 50 كيلومتر" بس الغريب انك فعلياً بتوصل لبوابات القاهرة قبل ما تكون مشيت 50 كيلومتر فعلاً، وده لأن المسافات بين القاهرة وأي محافظة تانية مش بتتقاس من بوابات كل محافظة، إنما المسافة للقاهرة بتتقاس من مركز القاهرة وهو موجود في المركز الرئيسي لهيئة البريد في العتبة على شكل نجمة في الأرض، وعشان كده المكان ده بيتسمى قلب القاهرة.