قبل مباراة مصر والسنغال.. الأرقام في صالح مين؟

مباراة مصر والسنغال القادمة في تصفيات كأس العالم 2022 هتكون يوم 24 مارس الجاي، والكسبان في المباراة هيصعد كأس العالم مباشرة، وفي 10 منتخبات أفريقية وصلت المرحلة التالتة والأخيرة من تصفيات كأس العالم 2022.

خلال شهر مارس الـ 10 منتخبات أفريقية هتلاعب بعض في 5 مواجهات فاصلة، واللي هيتأهل 5 منتخبات بس لنهائيات المونديال 2022، وكأس العالم هيتلعب في الفترة من 21 نوفمبر لغاية 18 ديسمبر.

وبالنسبة للقرعة هتكون في أول شهر أبريل الجاي في الدوحة بمشاركة 32 منتخب.

مجموعة مصر في تصفيات كأس العالم 2022

مصر كانت في مجموعة الجابون وليبيا وأنجولا ونجحت إنها تكون أول المجموعة بعد لعب 6 ماتشات فازت في 4 واتعادلت في 2 ومعاها 14 نقطة، وأول مباراة في مشوار التصفيات كانت قدام أنجولا في 1 سبتمبر 2021 والمباراة الأخيرة كانت قدام الجابون في 16 نوفمبر 2021.

مباراة مصر والسنغال القادمة

الفراعنة وأسود التيرانجا هيلعبوا في تصفيات كأس العالم 2022 "الدور الفاصل" في فترة التوقف الدولي خلال شهر مارس الجاي ، وتحديدًا في الفترة بين 24 و29 مارس.

لقاء الذهاب هيكون في القاهرة، ولقاء العودة هيكون في العاصمة السنغالية دكار.

كل منتخب اتأهل كام مرة؟

منتخب مصر اتأهل لكأس العالم 3 مرات، والمنتخب السنغالي اتأهل مرتين، ولو متعرفش خلينا نقولك إن الفراعنة وأسود التيرانجا كانوا موجدين في النسخة اللي فاتت من المونديال واللي كانت في روسيا 2018.

القيمة التسويقية للمنتخبين

• المنتخب السنغالي قيمته التسويقية حوالي 343 مليون و150 ألف يورو.
• قيمة المنتخب المصري التسويقية  161 مليون و250 ألف يورو.

اللاعب الأكتر قيمة تسويقية في مصر والسنغال

• محمد صلاح نجم ليفربول هو الأغلى بقايمة الفراعنة بقيمة 100 مليون يورو.
• ساديو ماني لاعب ليفربول الإنجليزي هو الأغلى في قايمة المنتخب السنغالي بقيمة 80 مليون يورو.

بمناسبة كلامنا عن نجمنا محمد صلاح اعرف أكتر عنه من هنا، محمد صلاح/Egyptian King بيستثمر فلوسه في ايه 2022؟

لغة الأرقام في صالح مين؟

• المنتخبين اتقابلوا 13 مرة قبل كدا.
• مصر فازت 7 مرات.
• السنغال فازت 4 مرات.
• التعادل كان في ماتشين بس.
• وكان من ضمن الـ 13 ماتش دول مرتين اتقابلوا الفراعنة مع أسود التيرانجا في تصفيات كأس العالم "دور المجموعات 2002" ومصر فازت مرة والتانية كانت تعادل لكن السنغال راحت المونديال في النهاية.
• مصر نجحت إنها تحرز 12 هدف في شباك السنغال.
• السنغال أحرزت 7 أهداف بس.
• الأعلى تهديفيًا لمنتخب مصر في مواجهات السنغال عمرو زكى برصيد 3 أهداف.