كل مثل وراه حكايته: أشهر 4 أمثلة شعبية وحكايتها
تاريخ النشر: 20 سبتمبر 2022 طرائف وعجائب
أصل الأمثلة الشعبية
الامثلة الشعبية هي جمل متوارثة هتلاقي فيها خلاصة تجربة او موقف معين و هتلاقي نفسك بتسمعها اكتر من مرة و كمان بتستخدمها في مواقف معينة.
طب ايه القصة ورا الأمثلة دي؟ دا اللي هنتكلم فيه و هنعرف الحكاية ورا اشهر اربع امثلة شعبية بنسمعها و بنستخدمها في حياتنا اليومية.
أشهر الأمثلة الشعية
"دخول الحمام مش زي خروجه"
اكتر مثل بنسمعه من الأمثلة الشعبية:
حكاية المثل دا ان كان في راجل من العثمانيين قرر انه يفتتح حمام تركي جديد و علشان يجر رجل الزبون علق يافطة على الباب ان "الدخول مجانا"والخبر انتشر في البلد كلها وناس كتير راحت .
بس المفاجأة ان بعد ما الناس دخلوا الراجل كان احتجز كل ملابسهم،و لما الزباين كانوا قرروا انهم يخرجوا رفض يسلمهم ملابسهم و طالبهم انهم يدفعوا ثمن استخدام الحمام علشان يخرجوا.
.وطبعًا الناس اتفاجأت انه غير كلامه واجهوه بأنه كتب على اليافطة ان دخول الحمام مجانا،و كان رده عليهم "دخول الحمام مش زي خروجه"
و دا اكتر مثل ممكن تسمعه لما حد يوعدك بحاجة و بعدين يلبسك في حيطة.
"جه يكحلها عماها"
دي بقى أصلها بيرجع لأسطورة ان في كلب و قطة كانوا متربين في قصر ناس أغنياء وكان في علاقة صداقة و مودة مابينهم و الكلب كان معجب جدا .بعنين القطة الجميلة و في يوم قرر يسألها عن سبب جمال عينيها
فكانت اجابتها ان السبب هو وجود الكحل في عينيها، الكلب غار و قرر انه كمان يكحل عينيه جاب الكحل و حطه على صوابعه و حطه في عينه علشان .يكحلها لكن المفاجأة كانت انه مخلبه دخل في عينيه فقعها
و من هنا جيه المثل و في الاغلب بتسمعه لما حد يحاول يعمل حاجة و يخربها.
"تحت القبة شيخ" و "احنا دافنينه سوا"
الحكاية ان كان في اخين فقيرين كان عندهم حمار و الحمار كان هو مصدر رزقهم و راس مالهم الوحيد و كانوا بيحبوه جدا و بيعتبروه فرد من العيلة لدرجة انهم اطلقوا عليه اسم"أبو الصبر".
و في يوم كانوا مسافرين و في الطريق الحمار وقع مات, دفنوه و قعدوا جنب المدفن يبكوا عليه وكان أي حد يمر يسألهم كانوا بيردوا بأنهم زعلانين على موت "أبو الصبر" و انه كان بيقضي ليهم حوائجهم و يدخلهم الرزق لدرجة ان الناس افتكرت ان "أبو الصبر" هو شيخ جليل و له كرمات.
"فبدأت الناس تتبرع ليهم و بعد فترة رفعوا خيمة على قبر "أبو الصبر" و الناس بدأت تتبرع اكتر و اكتر و من هنا جيه مثل "تحت القبة شيخ".
و في يوم الأخين اختلفوا على تقسيم التبرعات بينهم و واحد منهم غضب و قال للتاني “ انا هطلب من الشيخ أبو الصبر ينتقم منك و يرجع لي حقي”
فكان رد التاني "شيخ مين يا أخي؟ انت نسيت الحمار؟ دا احنا دافنينه سوا"
و دا اكتر مثل من الأمثلة الشعبية ممكن تكون بتسمعه في يومك ما بين اي اتنين صحاب.
و ماتنساش...
اوعى تنسى اهم مثل ان "القرش الأبيض ينفع في اليوم الأسود"، و دا واحد من اهم الأمثلة الشعبية اللي بتشجع على الحرص و التوفير.
, و ماتنساش ان فايدتي بتقدملك حاسبة الميزانية الشهرية و واللي من خلالها تقدر بسهولة تقسم دخلك الشهري على احتياجاتك الأساسية و الترفيهية و كمان المبلغ الهتوفره و كل دا بسهولة و في ثواني من هنا
