ليه تربي كلب؟ 5 حاجات بيقدمهالك كلبك ببلاش

انك تربي كلب دا من اكتر الحاجات الي هتفرق معاك على المستوى النفسي و الشخصي و حتى الصحي و البدني لأن كلبك ببساطة بيقدملك حاجات كتير من غير ما يستنى منك مقابل و كل البيحتاجه منك هو شوية أساسيات مش مكلفة خالص و في البلوج دا هتعرف أكتر عن فوايد تربية الكلاب.

فوائد تربية الكلاب

5 حاجات كلبك بيقدمهالك ببلاش

فوائد تربية الكلاب

• الحماية والأمان بالأخص لو بتربي كلب حراسة بس خلي بالك إن تدريب كلاب الحراسة مهم جدًا ليك و لأمان الناس اللي حواليك.
• هيحسن روتينك اليومي ويخليك تمارس رياضة بشكل مستمر كل ما تنزل تمشيه و ده بيساعدك تحافظ على لياقتك البدنية و صحة كلبك.
• هيساعدك تتعرف على ناس جديدة، لأنك في الأغلب كل ما تنزل تمشيه هتلاقيه بيتعرف على الكلاب التانيه الحواليه و بالتالي انت هتتعرف على اصحابهم.
• هيقلل نسبة توترك و يوصلك شعور بالسلام النفسي و السعادة, لأن اللعب مع الكلاب بيرفع من نسبة السيروتونين و الدوبامين البتوصلك للهدوء و الاسترخاء.
• وجود كلب في بيتك بيبعد عنك أمراض نفسية زي الاكتئاب و غيره بالأخص لو انت عايش لوحدك فهو هيبعد عنك الإحساس بالوحدة و العزلة  و دي من أهم فوائد تربية الكلاب على المستوى النفسي.

كلبك محتاج منك ايه؟

• انك توديه للطبيب البيطري و تحافظ على مواعيد تطعيماته
• لو جرو صغير فبيحتاج من وجبتين لتلاتة في اليوم و لو كلب كبير فبيحتاج وجبة واحدة في اليوم
• كلبك محتاج منك وقت للخروج و التمشية و اللعب و دي واحدة من اهم فوائد تربية الكلاب البتعود عليك.
• توفر له مكان لكل احتياجاته الأساسية من الأكل و الحمام للنوم و دا عشان تحافظ على النظام و النضافة في بيتك, بس ماتنساش ان التدريب هو العامل الأهم في انك تحافظ على النظام في حالة وجود كلب.
• لعب عشان يعضها بالذات لو الجرو في عمر من شهر ل6 شهور لأنه في المرحلة دي بيسنن و بيكون عايز يعض الحاجات الحواليه

حابب تعرف احتياجات كلبك هتكلفك كام؟ اعرف اكتر من هنا

ايه احسن أنواع كلاب للحراسة  وهيكلفوك اد ايه؟

أنواع و أسعار كلاب الحراسة

• البوكسر :سعر الجرو يبدأ من 800 ل4000 جنيه
• البيتبول : سعر الجرو بيبدأ من 2000 ل5000 جنيه
• الهاسكي : سعر الجرو بيبدأ من2000ل11000 جنيه
• الدوبر مان: سعر الجرو بيبدأ من 250ل1500 جنيه
• روت وايلر : سعر الجرو بيبدأ من2000 ل10000 جنيه
• الجيرمن شيبرد : سعر الجرو بيبدأ من 1500 ل 10000 جنيه

طب ايه أحسن أنواع الكلاب الصغيرة و هتكلفك اد ايه؟

أنواع وأسعار الكلاب الصغيرة

• تشيواوا: سعر الجرو بيبدأ من 1500 ل3500 جنيه
• جريفون: سعر الجرو بيبدأ من 500 ل2000 جنيه
• البج: سعر الجرو بيبدأ من 4000 ل 20000 جنيه
• يوركشاير ترير : سعر الجرو بيبدأ من 5000  ل 10000 جنيه

خلي بالك إن دي كلها أسعار تقريبية بتتحدد على أساس أنواع الكلاب و نقاء السلالة و العمر و مواصفات الحيوان الأليف.

تربية الكلاب مسؤولية كبيرة

و في النهاية زي ما اتكلمنا عن فوائد تربية الكلاب، لازم ماننساش إن الكلاب مسؤولية و لو مش مستعد ليها فالأحسن ماتجيبش كلب لو في احتمالية انك  تسيبه بعدين، و ماتنساش إن واحدة من أكبر فوائد تربية الكلاب في بيتك هو الإحساس الي بتحسه لما ترجع البيت بعد يوم طويل متعب و تلاقي كلبك مستنيك بمنتهى الحماس و السعادة.