يخت "جيف بيزوس" الجديد هيغير في جسر روتردام التاريخي

الجسر التاريخي "كونينغشفنبروغ - Koningshavenbrug" الفولاذي اللي اتبنى سنة 1878 في هولندا هيتم تفكيك جزء منه عشان يخت "جيف بيزوس" الجديد يعدي منه، وده مخلي كتير من الهولنديين بعد محاولاتهم للتعبير عن الاعتراض بس مفيش فايدة قرروا انهم يعملوا جروب ويتجمعوا وقت مرور اليخت وهيرموا عليه بيض، والجروب ده وصل عدد الناس فيه لـ 3,000 شخص لغاية دلوقتي ولسه العدد بيزيد.

مين هو "جيف بيزوس"؟

جيفري بريستون بيزوس هو رجل أعمال أمريكي ومؤسس موقع أمازون المعروف للشوبينج أونلاين، وكمان مؤخراً بقى عنده محلات بإسم أمازون للتسوق الذكي، والنجاح الكبير اللي حققه أمازون ألهمه يعمل شركة Blue Origin لرحلات السفر للفضاء وهدفها هو أن يكون في وجود دائم للعنصر البشري في الفضاء الخارجي، ده غير ان هو اللي طرح جهاز كيندل/Kindle للقراءة الإلكترونية واللي عن طريقه تقدر تشتري الكتب الالكترونية وتحملها. ويعتبر "جيف" أغنى رجل في العالم بثروة تقدر بـ 182.4 مليار دولار ومتوقع انه يكون من أوائل اللى هياخدوا لقب تريليونير في 2040.

اعرف أكتر عن رحلة جيف للفضاء من هنا: اخر نداء لتذكرة سفينة الفضاء New Shepard بـ 28 مليون دولار!

حكاية يخت "جيف" الجديد

جيف طلب من شركة Alblasserdam في منطقة البلاسيردام اللي مكانها قريب من مدينة روتردام انه يتصنع له "يخت فاخر" على أنه هيستلمه بعدها بسنين لأن اليخت الفاخر صناعته بتاخد حوالي 5 سنين، واليخت ده كلف "بيزوس" حوالي 500 مليون دولار وده يعتبر ضعف تمن صحيفة واشنطن بوست اللي اشتراها في 2013 بـ 250 مليون دولار.

واليخت ده ارتفاعه أكتر من 400 قدم يعني حوالي 121.92 متر وده رقم قريب جداً لارتفاع الهرم الأكبر "خوفو" وبرغم ضخامة اليخت إلا أن مانفعش يتعمل على اليخت مهبط للطائرات الهليكوبتر، عشان كده اتعمل يخت دعم فيه مهبط للطائرات الهليكوبتر عشان يكون ملحق باليخت.
 

وطبعاً كل ده خلى نقله للبحر أمر صعب من غير ما يعدي من تحت الجسر اللي بيوصل ارتفاعه لـ 130 قدم يعني تقريبا 39.62 متر بس، وده اللي خلى الحكومة وافقت على فكرة تفكيك أجزاء من الجسر الصيف ده عشان يعدي اليخت. 

سوق بيع و صناعة اليخوت

منطقة الجسر دي معروفة من زمان انها من أشهر مراكز تصنيع اليخوت في العالم، وأكدوا في الفترة الأخيرة ان مستويات الثروة الشخصية اللي بتزيد بشكل مستمر اليومين دول، ووصلت مبيعات اليخوت الفاخرة السنة اللي فاتت لمستويات قياسية، وبلغت مبيعاتها 887 وحدة من السفن سنة 2021 بزيادة حوالي 77% عن سنة 2020 وأكتر من ضعف الرقم اللي اتحقق في سنة 2019، وده بسبب ميل الأغنياء في فترة الكورونا للمسطحات المائية بدل مشاكل اغلاق المدن والتباعد الاجتماعي.