15 حاجة هتوفرها وأنت سينجل ومتنساش الارتباط إحباط!

متضايق إنك سينجل واحنا داخلين على الفلانتين valentine's day ونفس القصة بتحصل معاك كل سنة يوم 14 فبراير؟! ما تنساش إنك في نعمة وهنقولك على 15 حاجة أنت تقدر تعملها المرتبط ما يقدرش يعملها زيك يا بختك يا عم.

ايه دا طلعت مرتبط؟! طب happy valentines day  يا عم ماتزعلش نفسك، اعرف ايه 7 هدايا رومانسية في الفلانتين: خلي عيد الحب مختلف

1. التوفير عمومًا في حياتك يا بختك يا سيدي اللي في جيبك ملكك أنت وبس معندكش مصاريف المرتبطين.
 

2. مش هتضطر تمشي معاك هدايا في الشارع والناس كلها بتبص عليك في الـ valentines day ، وتلبس أحمر.
 

3. مش هتبقى مستعجل طول الوقت لأنك بتروح وتيجي براحتك مش ملتزم بمواعيد معينة ولا هتستناها ساعة وهي لسه واقفة قدام المراية.
 

4. مش هتدخل في قصة "مالك مفيش" وفي الاخر هتقولك أنت مش مهتم برضو.
 

5. هتقعد مع صحابك عادي ع القهوة وتنزل تلعب بلايستيشن من غير حصة نكد.
 

6. مش هتبقى مطالب تحفظ تواريخ عيد ميلادها وأول يوم اتقابلتوا وأول مرة بصيت في عينيها وأول مرة قولتلها بحبك وغيرها من التواريخ.

هتدفع لنفسك وبس وتاكل في أي مكان عادي مش لازم الأماكن الغالية

7. لما تروح تاكل في مكان هتطلب كل اللي نفسك فيه براحتك لأن ميزانيتك ملكك أنت وبس.

8. لما تقعد على قهوة مش هتطلب مايه معدنية لأنك لو كنت مرتبط كنت هتبقى مجبر تحاسب عليها علشان ما يتقالش عليك بخيل.
 

9. هتوفر باقة الموبايل والنت، وهتعرف تنام براحتك.
 

10.                      مش هتبقى مجبر ع المورينج تيكست بتاعة كل يوم.
 

11.                      مش هتبقى مجبر تجيب هدايا وتظبط خروجات في كل المناسبات في أعياد الميلاد والعمال والأم.

12.                      هتترحم من الخروجات اللي أنت لازم تدفع فيها لشخصين مش لشخص واحد.

13.                      مش هتدفع فلوس مواصلات كتير ليها ما أهو لو خارج معاها أكيد مش هتركبوا ميكروباص أو نقل عام هتضطر تطلب أوبر أو تاكسي ويا خبر أبيض لو ساكنة في أكتوبر وأنت ساكن في الناحية التانية من الكوكب.

14.                      وأنت سينجل مش هتقعد تخطط للمستقبل كل شوية وتبقى متوتر بالعكس هتعيش حياتك ببساطة واليوم بيومه.

15.                      هتصحى براحتك خالص وكمان تقدر تركز في الشغل أكتر وفي حياتك عمومًا مفيش حاجة ضغطة عليك علشان تعرف تطور من نفسك.