10 افكار موفرة لهدايا الفلانتين | فايدتي

10 افكار موفرة لهدايا الفلانتين

تاريخ النشر: في طرائف وعجائب

10 افكار موفرة لهدايا الفلانتين

ليست كاملة لهدايا فلانتين موفرة ممكن تختار اللي يناسب ميزانيتك

الفلانتين على الأبواب وأكيد بدأت تدور على هدية، ولأن الحب أكتر حاجة مش محتاج تدفع فيه كتير عشان تثبته هنقولك علي هدايا مش غالية عشان تحتفل من غير ما تبوظ الميزانية.

 

1- رحلات اليوم الواحد

 

احجز سفرية ليوم واحد في الويك إند وغيروا جو مع بعض، الرحلات دي منتشرة جدا الأيام دي عشان الشتا، عندك اختيارات كتير ما بين الفيوم والاسكندرية والعين السخنة والبرلس وسقارة، والرحلة كلها ممكن تتكلف من 400 لـ 1,000 جنيه للفردين.

 

2- اشتري فضة

 

الفضة بتعتبر اختيار مناسب للاكسسوارات والميداليات للبنات والرجالة، وأسعارها ممكن تبدأ من 200 جنيه.

 

3- أدوات مساج

 

مين فينا مبيقولش "نفسي حد يعملي مساج" على الأقل مرة في الشهر، ممكن تحجز جلسة مساج لشريكك والأحلى لو اشتريت أدوات مساج، ودي هتلاقيها أونلاين وبتختلف أسعارها على حسب الأنواع والماركات، بس عموما بتبدأ من 200 جنيه.

 

4-المستلزمات اليومية

 

من أهم قواعد شراء الهدية أنها تكون مفيدة زي مستلزماتك اليومية زي البرفان والمكياج للبنات، خصوصا أنها هتفكر شريك حياتك بيك كل مايستخدمها. أسعار المكياج والبرفانات بتختلف علي حسب نوعها بس ممكن نقول انها بتبدأ من 100 جنيه.

 

5-عشان الطريق

 

في مستلزمات يومية تانية ممكن يستخدمها الناس اللي طريق شغلهم طويل، زي مخدة الرقبة والمج الحراري، ودول برضه اسعارها بتبدأ من 100 جنيه.

 

مفيش احلى من الهدية اللي معمولة ليك انت مخصوص

 

6- جلسة تصوير

 

مهما جالك ليكات على صور السوشيال ميديا هتفضل الصور المطبوعة أحلى ذكريات خصوصا لو اتحطت في برواز على الحيطه، فممكن تعملوا سيشن تصوير مختلفة عن صور الفرح والخطوبة، سعر حجز السيشن مع المصورين المشهورين بيبدأ تقريبا من 300 جنيه.

 

7- هدية مخصوصة 

 

مفيش احلى من الهدية اللي معمولة ليك انت مخصوص، فممكن تطبع اسم شريكك أو صورة/جملة من فيلمه المفضل علي مج او شمعة بخور، أو علي شنطة قماش أو تيشرت، الهدية دي ممكن تتكلف أقل من 100 جنيه.

 

8-هدايا تقليدية 

 

مفيش ولا فكرة عجباك؟! يبقي خلينا في التقليدي، ورد أو شوكولاتة أو كتاب، بس اختار كويس اللي يعجب شريكك، يعني نوع شوكولاته المفضلة، وكتاب في المجال اللي بيحبه مثلا.

 

9- أكلة حلوة

 

الأكل أهم بالنسبة لكم من الهدية! يبقى طلعي الشيف اللي جواكي وأعملي أكلة حلوة واطلعوا بيها في الخضرة في مكان مفتوح عشان تغيروا جو، وبالنسبة للرجالة لو قلت لمراتك ان الغدا عليك وعملت نفس الفكرة دي بأكل من بره مراتك هتتبسط بيك أوي. أحسن اختيار للمكان المفتوح هو حديقة الأزهر وسعر تذكرة الدخول من الأحد للخميس 25 جنيه والجمعة والسبت 30 جنيه للفرد وبتفتح ك يوم من 9 لـ 10.

 

10- برطمان التفاؤل

 

مفلس أوي يعني؟؟ مش مشكلة برضه ممكن تجيب هدية من غير ولا مليم، دور علي برطمان فاضي في بيتك وزينه، وطلع شوية امثال وحكم عن التفاؤل والحب من الانترنت واكتبهم على ورق صغير، كده يبقي خلص برطمان التفاؤل اللي هيحس بيها شريكك أنك حاسس بيه في كل مواقف حياته.