8 خروجات مش مكلفة في القاهرة لـ ليلة رأس السنة 2022

السنة الجديدة خلاص قربت وهتنتهي 2021 بكل اللي حصل فيها اللي أكيد اتعلمت منه حاجات هتخليك أحسن وتطور من نفسك وطريقة تفكيرك في السنة الجديدة، وميزة ليلة رأس السنة المرة دي انها في اجازة نهاية الاسبوع فـ كلنا عايزين نحتفل بيها حتى لو كنت مابتحتفلش قبل كده من باب انك تستغل الاجازة وتتفرج على الاحتفالات.

بس فيه قلق كده ان الخروجات في اليوم ده هتكون مكلفة أو غالية بس ده مش حقيقي، انت تقدر تحتفل وتقضي ليلة رأس السنة بأقل التكاليف عشان تبدأ السنة الجديدة من غير ما تبوظ الميزانية.

أماكن تروحها ليلة راس السنة ومش مكلفة:

1- المولات 

كل المولات الكبيرة زي: سيتي ستارز، كايرو فستيفال سيتي، سيتي سنتر الماظة، مول العرب ومول مصر عاملين ديكورات وموسيقى للاحتفال بـ رأس السنة ف تقدر تروح اقرب مول ليك وتتصور هناك براحتك وتقعد في المكان اللي يريحك ومايكلفش كتير.

2- الشيخ زايد

هناك فيه اماكن كتير تقدر تروحها زي: أركان بلازا كابيتال بيزنس بارك وهناك  هتمشى وتتصور مع ديكورات راس السنة من غير اى فلوس وبعدها تختار هتقعد فين لو حابب تتعشى أو تاخد مشروب دافي.

3- برج القاهرة

هناك تقدر تشوف كل الألعاب النارية اللي هتتعمل في القاهرة كلها وقت بداية السنة الجديدة والمشهد من فوق هيكون مميز جداً ومش هيكلفك غير تذكرة الدخول اللي تمنها 40 جنيه وبس، وممكن تقعد في مطعم البرج وتختار حاجات على قد ميزانيتك وهتدفع حد أدنى للفرد 75 جنيه.
 

4- شارع المعز

لو حابب تحتفل بـ ليلة راس السنة بشكل عربي أكتر، هتلاقي في شارع المعز ديكورات السنة الجديدة بس وسط مكان بسيط وطراز عربي قديم، ده غير ان بيكون موجود كمان مغنيين أو عازفين جايين عشان اليوم ده، فـ هتقضي هناك ليلة مميزة جداً ومختلفة عن اي مكان تاني.

5- وفرها

موقع وفرها / Waffarha.com هيساعدك جداً تلاقي عروض وخصومات في فنادق ومطاعم على النيل وكمان انشطة ترفيهية تعملها ليلة راس السنة، اختار اللي يناسبك واستمتع باليوم. 

6- حفلة ويجز 

هيكون معاه ليجي سي و ديزي فـ لو ليك في الراب هتتبسط جداً، مكانها في فاميلي بارك، الحفلة تذكرتها من 300 لـ 500 جنيه.

7- دار الأوبرا المصرية 

اوركستر القاهرة السيمفونية عاملين حفلة في دار الأوبرا بمناسبة رأس السنة هتبدأ الساعة 8 وسعر التذكرة بيبتدي من 110 جنيه.

8- رووم آرت سبيس

لو بتحب الروك فـ رووم عاملين حفلة لـ Paranoid eyes و Stigma الساعة 8 بالليل وبعدها هيكون فيه كاريوكي تقدر تغني براحتك انت واصحابك لغاية العد التنازلي للسنة الجديدة، وأسعار التذاكر بتبدأ من 100 لحد 200 جنيه حسب حابب تحضر ايه!