آخر اخبار مبادرة التمويل العقاري أبريل 2021 | فايدتي

آخر اخبار مبادرة التمويل العقاري أبريل 2021

تاريخ النشر: في عالم المال

آخر اخبار مبادرة التمويل العقاري أبريل 2021

اعرف اخر تطورات مبادرة البنك المركزي للتمويل العقاري لشهر ابريل 2021

تحت شعار "شقة بسعر الايجار" الرئيس عبد الفتاح السيسي أصدر مبادرة جديدة للتمويل العقاري عن طريق البنك المركزي، المبادرة أفضل بكتير من اللي قبلها اللي بدأت في نوفمبر 2020 لأنها بتخفف العبء عن المواطن اللي محتاج شقة لكن فلوسها مش جاهزة معاه دلوقتي، وده غير أنها هتساعد في انتعاش حركة بيع وشراء الوحدات السكنية، المبادرة دي متوقع فتح التقديم عليها خلال الأيام المقبلة،

فـ لو عندك شقة وعايز تبيعها جهّز أوراقها كلها عشان البنك يقبلها بسرعة.

 

ايه الجديد في المبادرة دي عن اللي قبلها؟

 

  • سعر الفايدة 3% متناقصة، يعني تقريباً 1% ثابتة، بدل 8% في المبادرة القديمة.
  • هتقدر تسدد في مدة بتوصل لـ 30 سنة، بدل 20 سنة في الأولى.
  • مفيش مساحة محددة للوحدة اللي هتختارها (خاص بفئة متوسطي الدخل)

 

ممكن تعرف أكتر عن المبادرة القديمة من هنا: اعرف أكتر عن مبادرة البنك المركزي للتمويل العقاري

 

الشروط المطلوبة في المُتقدم:

 

  • الدخل الشهري لفئة محدودي الدخل لازم يكون 4,500 جنيه مصري أو أقل للفرد و 6,000 جنيه للأسرة (دخل الزوج + الزوجة).
  • الدخل الشهري لفئة متوسطي الدخل هو 10,000 جنيه مصري أو أقل للفرد و 14,000 جنيه للأسرة.
  • مش لازم تكون موظف، ممكن تكون صاحب عمل حر.
  • ماتكونش استفدت قبل كده بأي مبادرة تمويل عقاري.
  • الـ i-score بتاعك يكون مظبوط.
  • يكون معاك 20% من اجمالي تمن الوحدة السكنية اللي محتاجها.

 

الشروط المطلوبة في الشقة اللي هتختارها:

 

  • لو كنت من محدودي الدخل فـ عندك الامكانية تختار شقة سعرها في حدود 350,000 جنيه.
  • أما لو انت من متوسطي الدخل فـ تم رفع الحد الأقصى لسعر الوحدة عشان يبقى في حدود من 1.1 لـ 1.4 مليون جنيه.
  • ماينفعش تستغل المبادرة في تمويل السكن السياحي، زي المصايف مثلاً.
  • لازم الوحدة السكنية تكون مسجلة، ومفيش عليها مخالفات.
  • كمان لازم تكون متشطبة وجاهزة للمعيشة.
  • لو انت اللى هتبيع الشقة اتأكد ان كل أوراق التسجيل جاهزة ومفيش على وحدتك أي مخالفات.

 

الأوراق المطلوبة للتقديم:

 

لو موظف هتجيب:

 

  • صورة البطاقة
  • مفردات مرتب معتمدة من جهة العمل.
  • تعهد من جهة العمل بتحويل المرتب للبنك اللي هيمول الشقة.
  • كشف حساب بنكي لمدة 6 شهور.
  • لو متجوز جهز صورة قسيمة الجواز.
  • عقد تمليك أو ايجار المكان اللي ساكن فيه دلوقتي.

 

لو صاحب عمل حُر هتجيب:

 

  • صورة البطاقة
  • شهادة من محاسب قانوني تحدد الدخل السنوي أو الشهري.
  • البطاقة الضريبية و مستخرج السجل التجاري.
  • لو متجوز جهز صورة قسيمة الجواز.
  • عقد إيجار أو تمليك المكان اللي ساكن فيه دلوقتي.