أزمة دولارات محمد رمضان ومقارنتها بمرتبات الموظفين! | فايدتي

أزمة دولارات محمد رمضان ومقارنتها بمرتبات الموظفين!

تاريخ النشر: في عالم المال

أزمة دولارات محمد رمضان ومقارنتها بمرتبات الموظفين!

تفتكر محمد رمضان رمي كام دولار في الفيديو؟

القصة بدأت فى أول 2020 لما محمد رمضان طلب من الطيار أشرف أبو اليسر إنه يسوق الطيارة، وبالفعل ظهر وقتها في فيديو على وسائل التواصل الإجتماعي وهو قاعد مكان الطيار، وطبعا ده وقع الطيار في مشكلة كبيرة واتفصل من شغله واتوقف عن العمل بشكل نهائي، ومؤخرا اتحكم على محمد رمضان بدفع 6 مليون جنيه كتعويض للطيار، وبعد الحكم ظهر محمد رمضان في فيديو وهو بيرمي دولارت في حمام السباحة، وفي فيديو تاني بيرمي الفلوس على الأرض قدام أسد مربيه. 

 

بعض الإعلاميين والمشاهير فى وسائل الإعلام كان ليهم رأي في القضية زي:

 

الإعلامي عمرو أديب

 

اللي طلع يوم 11 أبريل 2021 في برنامج "الحكاية" اللي بيقدمه على قناة MBC مصر، وظهر عليه غضب بسبب إساءة محمد رمضان ليه بعد ما اعترض علي فيديو "رمي الفلوس"، وقال أديب إنه مش هيتجاوز معاه وبالفعل رفع عليه قضيه عشان يأخد حقه بالقانون. 
وعن تعليق أديب على فيديو وقال أن الناس مش لاقية فلوس، في الوقت اللي رمضان بيرميها في البيسين، بغض النظر إذا كانت مزيفة ولا حقيقة.

 

وكيل الأزهر السابق عباس شومان

 

وبعد 1.8 مليون مشاهدة لاّخر فيديو لـ رمضان، وجه له عباس شومان على وسائل التواصل الإجتماعي رسالة قوية، قال فيها إن اللي بيحصل ده استفزاز للناس وخاصة اللي مش قادرين يجمعوا قوت يومهم.

بعد كلام كتير من المشاهير وتعليقات من عامة الشعب على قضية الطيار ورمضان، اللي أكد امبارح في برنامج "مساء DMC" مع الإعلامية إيمان الحصري أن الفلوس دي مزيفة والفيديو كله دعايا إعلانية لمنتج لسه هيظهر قريب، هنقولكم عن أحدث الإحصائيات لمرتبات الموظفين في مصر مقارنة بالـ 6 مليون اللى هيدفعهم محمد رمضان تعويض للطيار.

 

تفتكر رمضان كان فاهم سلبيات الفيديو وهو بيعبر عن غضبه ولا لأ؟

 

متوسط مرتبات المصريين في 2021، بحسب Salary Explorer 

 

  • متوسط الحد الأدنى للمرتبات في مصر 2,330 جنيه
  • متوسط المرتبات 8,460 جنيه
  • 25% من الموظفين بيكسبوا أقل من 4,860 جنيه، و75% بيكسبوا أكتر منها

 

رمضان رمي كام في حمام السباحة؟

 

واضح من الفيديو ان محمد رمضان كان بيرمي ورق بـ مية دولار، ولو قلنا أن اللي اترمي في البيسين حوالي 1000 ورقة، يبقي رمضان رمي في حمام السباحة 100,000 دولار، وأقل سعر لبيع البنوك للدولار النهاردة علي فايدتي 15.72 جنيه في البنك العربي، يبقى رمي حوالي 1,572,000 جنيه مصري.

 

دولارات رمضان VS مرتبات الموظفين!

 

 بما أن متوسط الحد الأدنى للمرتبات في مصر طلع 2,330 جنيه، يبقي محمد رمضان رمي دولارات تكفي تقريبا مرتبات 675 موظف في شهر.

تفتكر رمضان كان فاهم سلبيات الفيديو وهو بيعبر عن غضبه ولا لأ؟ قلنا رأيك علي ستوري الـ Instagram 

وبمناسبة الدولار، لو عايز تعرف سعر باقي العملات الأجنبية في البنوك المصرية النهاردة أدخل على محول عملات فايدتي