إيه العلاقة ما بين طباعة الفلوس ومشكلة التضخم؟
تاريخ النشر: 10 يناير 2022 عالم المال
الفلوس بالظبط زي أي سلعة بتتأثر بالعرض والطلب
أكيد جه في بالك قبل كدا سؤال، هو لما الدول تطبع فلوس كتير هل دا هيتسبب في التضخم؟ طيب ايه العلاقة ما بينهم أصلًا؟! خلينا نقولك في الأول يعني ايه تضخم
التضخم ببساطة هو نسبة ارتفاع أسعار السلع والخدمات في خلال فترة زمنية محددة، وبيأثر على القوة الشرائية للعملة، وده معناه إن كل ما نسبة التضخم بترتفع، كل ما العملة بتفقد قيمتها، فلو بتقدر تشتري 5 منتجات بنفس القيمة، مع التضخم العدد ده بيقل.
اعرف اكتر عن التضخم من هنا، يعني إيه تضخم، وإيه هي أنواعه؟
فكرة طباعة الفلوس:
الدولة لو فضلت تطبع فلوس كتير بدون زيادة حقيقة في الإنتاج زي بالظبط اللي بيعمل عصير مانجا وعمال يزود الماية كتير جدًا من غير ما يزود مانجة أو سكر فبالتالي المشروب هيبوظ ومش هيكون فيه أي طعم مميز.
الفلوس بالظبط زي أي سلعة بتتأثر بالعرض والطلب، وطباعة فلوس بدون زيادة حقيقية في الإنتاج هتكون سبب رئيسي في التضخم وبالتالي هيحصل زيادة عامة في الأسعار.
اعرف اكتر عن قانون العرض والطلب من هنا، إيه هو قانون العرض والطلب، وازاي بيأثر على الأسعار؟
عودة إلى التاريخ
على سبيل المثال ألمانيا بعد الحرب العالمية الأولى عانت من مشكلة طباعة الفلوس والتضخم اللي حصل، وقررت بسبب الديوان المتراكمة إنها تطبع فلوس وقتها انهارت قيمة العملة المحلية (المارك).
مش بس كده ده كمان ألمانيا فشلت في سداد ديونها سنة 1923، واحتلت فرنسا وبلجيكا جزء من الأراضي الألمانية علشان تحصل على مستحقاتها في شكل أصول ثابتة.
يعني من الاخر طباعة فلوس كتير مش هتحل لك مشاكلك الاقتصادية بالعكس دى ممكن تكون سبب في التضخم وإن العملة قيمتها تقل!
